મર્સિડીઝના ડ્રાઇવર કિમી એન્ટોનેલી ફોર્મ્યુલા-1ના સૌથી યુવા વર્લ્ડ ચેમ્પિયન બની ગયા છે. 20 વર્ષની ઉંમરે તેમણે આ ખિતાબ જીત્યો. રવિવારે મેક્સિકો સિટી ગ્રાં પ્રીમાં તેમણે ત્રીજું સ્થાન મેળવ્યું, અને ત્યાર બાદ તેમનું ચેમ્પિયનશિપ નિશ્ચિત થઈ ગયું.
આ પહેલાં જર્મનીના સેબેસ્ટિયન વેટલે 2010માં 23 વર્ષ અને 133 દિવસની ઉંમરે પોતાનું પહેલું F1 વર્લ્ડ ટાઇટલ જીત્યું હતું. એન્ટોનેલીએ એ 16 વર્ષ જૂનો રેકોર્ડ તોડી નાખ્યો છે.
એન્ટોનેલી 1953 પછી ફોર્મ્યુલા-1 ચેમ્પિયન બનનારા ઇટાલીના પ્રથમ ડ્રાઇવર પણ છે. આ પહેલાં અલ્બર્ટો આસકારીએ 1952 અને 1953માં સતત બે ખિતાબ જીત્યા હતા.
તેમણે પોતાની બીજી જ સિઝનમાં આ ખિતાબ જીત્યો છે. ચાર રેસ હજુ બાકી હોવા છતાં તેમણે ચેમ્પિયનશિપ પોતાના નામે કરી લીધી છે. એન્ટોનેલી 21મી સદીમાં જન્મેલા પ્રથમ F1 વર્લ્ડ ચેમ્પિયન પણ બન્યા છે.
મેક્સિકો સિટી ગ્રાં પ્રીમાં એન્ટોનેલી ત્રીજા સ્થાને રહ્યા. મેક્સ વર્સ્ટાપેને રેસ જીતી, જ્યારે લૂઇસ હેમિલ્ટન બીજા સ્થાને રહ્યા.
ચેમ્પિયન બન્યા બાદ એન્ટોનેલી પોતાની લાગણીઓ રોકી શક્યા નહીં. તેમણે ટીમને કહ્યું, "અમે કરી બતાવ્યું, અમે કરી બતાવ્યું." પોડિયમ પર પણ તેમની આંખોમાં આંસુ હતા.
આ સીઝનમાં એન્ટોનેલીનું પ્રદર્શન શાનદાર રહ્યું. જાપાન ગ્રાં પ્રી બાદ તેમણે ડ્રાઇવર ચેમ્પિયનશિપમાં લીડ મેળવી હતી. ત્યાર બાદ પ્રથમ છ રેસમાંથી પાંચ જીતી. મેક્સિકો પહોંચ્યા ત્યાં સુધીમાં તેમના નામે નવ ગ્રાં પ્રી જીત હતી.
તેમના સીઝનનું સૌથી યાદગાર પ્રદર્શન ઇટાલીના મોન્ઝામાં જોવા મળ્યું. અહીં તેમણે 19મા ક્રમાંકેથી શરૂઆત કરવા છતાં રેસ જીતી.
લૂઇસ હેમિલ્ટને 2025 સીઝન પહેલાં ફેરારીમાં જવાનો નિર્ણય કરતાં મર્સિડીઝને નવા ડ્રાઇવરની શોધ હતી. ટીમ પ્રિન્સિપાલ ટોટો વોલ્ફે અનુભવી ડ્રાઇવરની જગ્યાએ યુવાન એન્ટોનેલી પર વિશ્વાસ મૂક્યો. ત્યારે તેમની ઉંમર માત્ર 18 વર્ષ હતી.
એન્ટોનેલીએ 2025માં પોતાની ડેબ્યૂ સીઝનમાં 150 પોઈન્ટ્સ મેળવ્યા અને ડ્રાઇવર ચેમ્પિયનશિપમાં સાતમા સ્થાને રહ્યા. તેમણે ત્રણ પોડિયમ પણ હાંસલ કર્યા હતા.
કિમી એન્ટોનેલીનો જન્મ 25 ઑગસ્ટ 2006ના રોજ ઇટાલીના બોલોન્યામાં થયો હતો. તેમના પિતા માર્કો એન્ટોનેલી પણ રેસિંગ ડ્રાઇવર રહી ચૂક્યા છે અને મોટરસ્પોર્ટ્સ ટીમ ચલાવે છે.
કિમીએ સાત વર્ષની ઉંમરે કાર્ટિંગ શરૂ કર્યું હતું. 2019માં 12 વર્ષની ઉંમરે તેઓ મર્સિડીઝના જુનિયર પ્રોગ્રામ સાથે જોડાયા હતા.
2022માં તેમણે ઇટાલિયન અને જર્મન ફોર્મ્યુલા-4 ચેમ્પિયનશિપ જીતી હતી. ત્યારબાદ 2023માં ફોર્મ્યુલા રિજનલ યુરોપિયન અને મિડલ ઈસ્ટ ચેમ્પિયનશિપ પોતાના નામે કરી હતી. 2024માં તેઓ સીધા ફોર્મ્યુલા-2માં પહોંચ્યા અને બે રેસ જીતી. ફોર્મ્યુલા-3માં ભાગ લીધા વિના જ તેમણે F2 સુધીની સફર ખેડી હતી.
ફોર્મ્યુલા-1માં સમગ્ર સિઝનમાં સૌથી વધુ પોઈન્ટ્સ મેળવનાર ડ્રાઇવર વર્લ્ડ ચેમ્પિયન બને છે. દરેક ગ્રાન્ડ પ્રીમાં ટોચના 10 ડ્રાઇવરોને પોઈન્ટ્સ મળે છે. પ્રથમ સ્થાને રહેનારને 25, બીજા સ્થાને રહેનારને 18, ત્રીજા સ્થાને રહેનારને 15 અને 10મા સ્થાને રહેનારને 1 પોઈન્ટ મળે છે.
એક સિઝનમાં સામાન્ય રીતે 20થી 24 ગ્રાન્ડ પ્રી રેસ હોય છે. 2026ની સિઝનમાં કુલ 23 રેસ નિર્ધારિત છે.
જો બે અથવા તેનાથી વધુ ડ્રાઇવરોના પોઈન્ટ્સ સરખા હોય, તો સૌથી વધુ રેસ જીતનારને ચેમ્પિયન માનવામાં આવે છે. જીતની સંખ્યા પણ સરખી હોય, તો બીજા સ્થાનનું ફિનિશ અને ત્યારબાદ ત્રીજા સ્થાનનું ફિનિશ સરખાવવામાં આવે છે. તેને કાઉન્ટબેક નિયમ કહેવામાં આવે છે.