આર્ટિફિશિયલ ઇન્ટેલિજન્સ કંપની એન્થ્રોપિક પીબીસીએ અમેરિકામાં પોતાનું ઇનિશિયલ પબ્લિક ઑફરિંગ એટલે કે IPO લાવવાની યોજના જાહેર કરી છે. આ માટે કંપનીએ અમેરિકાના સિક્યોરિટીઝ એન્ડ એક્સચેન્જ કમિશન (SEC) પાસે રજિસ્ટ્રેશન ફોર્મ સબમિટ કર્યું છે.
કંપની પોતાના ક્લાસ A કોમન સ્ટોકને નૅસ્ડૅક ગ્લોબલ સિલેક્ટ માર્કેટ પર ટિકર સિમ્બોલ 'ANT' હેઠળ લિસ્ટ કરવા માંગે છે.
એન્થ્રોપિકે હાલમાં IPO હેઠળ વેચવામાં આવનારા શેરોની સંખ્યા અથવા તેમની સંભવિત પ્રાઇસ બૅન્ડ જાહેર કરી નથી. આ ઑફરિંગમાં કંપની નવા શેર જારી કરશે. આ સાથે જ વર્તમાન શેરહોલ્ડર્સ પણ આ ઇશ્યૂમાં પોતાની હિસ્સેદારી વેચશે. શેરહોલ્ડર્સ દ્વારા વેચવામાં આવનારા શેરોથી મળનારી રકમ પર એન્થ્રોપિકનો કોઈ અધિકાર રહેશે નહીં. કંપનીએ એ પણ સ્પષ્ટ કર્યું છે કે આ ઑફરિંગ પહેલાં તેના ક્લાસ A કોમન સ્ટોક માટે કોઈ જાહેર બજાર ઉપલબ્ધ નહોતું.
ફાઇલિંગમાં આપેલા આંકડા મુજબ, એન્થ્રોપિકે આ વર્ષની પ્રથમ છમાહી માટે $16.3 બિલિયનની આવક નોંધાવી છે. જોકે, આ જ સમયગાળા દરમિયાન કંપનીને $80.7 બિલિયનનું કુલ ચોખ્ખું નુકસાન એટલે કે નેટ લોસ પણ થયું છે.
કંપનીએ પોતાની ફાઇલિંગમાં રોકાણકારોને ચેતવણી આપતાં જણાવ્યું છે કે તે ભવિષ્યમાં નફો કમાવવામાં અથવા તેને જાળવી રાખવામાં અસમર્થ પણ થઈ શકે છે. આ ચેતવણી એઆઈ ઇન્ફ્રાસ્ટ્રક્ચરમાં મોટા પાયે થઈ રહેલા રોકાણ અને બિઝનેસ વિસ્તરણ સાથે જોડાયેલા નાણાકીય જોખમોને દર્શાવે છે. એન્થ્રોપિકે એમ પણ જણાવ્યું છે કે તેના પર મોટા ખર્ચના કમિટમેન્ટ્સ પણ છે, જેમાં 2033 સુધી ગૂગલ સાથે આશરે $114.5 બિલિયન ખર્ચ કરવાની યોજના પણ સામેલ છે.
એન્થ્રોપિકના એન્ટરપ્રાઇઝ બિઝનેસનો વ્યાપ ઝડપથી વધ્યો છે. કંપની પાસે છેલ્લા 12 મહિનાના આધારે $1 મિલિયનથી વધુ આવક આપતા 1,900થી વધુ ગ્રાહકો છે.
મીડિયા અહેવાલો મુજબ, આ IPOથી એન્થ્રોપિકનું વેલ્યુએશન $2 ટ્રિલિયન સુધી પહોંચી શકે છે, જોકે કંપનીએ સત્તાવાર રીતે કોઈ વેલ્યુએશન અથવા ઓફરિંગની શરતોની પુષ્ટિ કરી નથી.
ગોલ્ડમેન સૅક્સ અને મોર્ગન સ્ટેનલી આ IPOના બુકરનર છે. એન્થ્રોપિકના લિસ્ટિંગથી વૉલ સ્ટ્રીટ પર એ કસોટી થશે કે રોકાણકારો અદ્યતન AI મોડલ વિકસાવવાના ઊંચા ખર્ચની સરખામણીમાં આ ક્ષેત્રની વૃદ્ધિની સંભાવનાનું મૂલ્યાંકન કેવી રીતે કરે છે.
કંપનીએ પોતાની ફાઇલિંગમાં એડવાન્સ AI સાથે જોડાયેલા સંભવિત વિનાશક અને માનવતાના અસ્તિત્વ માટેના જોખમો અંગે પણ ચેતવણી આપી છે. આ ખુલાસો AI સેફ્ટી અને વધુ સક્ષમ બનતી સિસ્ટમ્સ સાથે જોડાયેલા સંભવિત પરિણામો અંગે ચાલી રહેલી વૈશ્વિક ચર્ચાને ઉજાગર કરે છે.
જ્યારે પણ કોઈ કંપની અમેરિકામાં પબ્લિક થવા માગે છે એટલે કે IPO લાવે છે, ત્યારે તેણે US સિક્યોરિટીઝ એન્ડ એક્સચેન્જ કમિશન (SEC) સમક્ષ એક રજિસ્ટ્રેશન ફોર્મ જમા કરાવવું પડે છે, જેને Form S-1 કહેવામાં આવે છે. આમાં કંપનીના બિઝનેસ મોડલ, નાણાકીય સ્થિતિ (રેવન્યુ/નુકસાન), પ્રમોટર્સ અને ભવિષ્યના સંભવિત જોખમોની સંપૂર્ણ અને સચોટ માહિતી આપવી અનિવાર્ય હોય છે.