સત્ય. સાહસ. સંકલ્પ.

અનન્યા પાંડેએ નેપોટિઝમ પર કહ્યું: 'ચંકી પાંડેની દીકરી હોવા પર ગર્વ છે'

અનન્યા પાંડેએ નેપોટિઝમ પર કહ્યું: 'ચંકી પાંડેની દીકરી હોવા પર ગર્વ છે'

બોલિવૂડ અભિનેત્રી અનન્યા પાંડેએ નેપોટિઝમ (વંશવાદ) અને તેમની પેઢી (જન-ઝી) વિશે ખુલીને વાત કરી છે. તેમણે કહ્યું કે તેઓ નેપોટિઝમને નકારતા નથી અને પોતાના પિતા ચંકી પાંડેની દીકરી હોવા પર તેમને ગર્વ છે.

હિંદુસ્તાન ટાઇમ્સને આપેલા ઇન્ટરવ્યુમાં અનન્યાએ જણાવ્યું કે યુવા પેઢીને કોઈ કારણ વિના બદનામ કરવામાં આવે છે, જ્યારે તેમની સફળતાની વ્યાખ્યા અને કામ કરવાની રીત અલગ છે.

જન-ઝી વિશેની ધારણાઓ પર નારાજગી વ્યક્ત કરતાં તેમણે કહ્યું, "મને ખરેખર લાગે છે કે જન-ઝીને કોઈ કારણ વિના બદનામ કરવામાં આવે છે. આજની પેઢી માટે સફળતાની વ્યાખ્યા જ અલગ છે." તેમણે સમજાવ્યું કે અગાઉના સમયમાં સફળતા માટે એક જ નિશ્ચિત માપદંડ હતો અને તેને પ્રાપ્ત કરવા ચોક્કસ માર્ગ પર ચાલવું પડતું, પરંતુ જન-ઝી તેનાથી અલગ છે.

અનન્યાએ પોતાની કામ કરવાની શૈલી વિશે કહ્યું કે તેઓ વ્યસ્ત અને પડકારજનક વાતાવરણમાં વધુ સારું કામ કરે છે. તેમને વધુ કલાકો સુધી કામ કરવું ગમે છે, પરંતુ આ નિયમ દરેક માટે લાગુ થવો જરૂરી નથી. તેમણે ઉમેર્યું, "કદાચ મારી પેઢીની બીજી કોઈ વ્યક્તિ એટલી સખત મહેનત કર્યા વિના પણ એટલી જ સફળ થઈ શકે. કામ કરવાની અને આગળ વધવાની તે તેમની પોતાની રીત છે."

'સ્ટુડન્ટ ઑફ ધ યર 2'થી ડેબ્યૂ કર્યા બાદથી અનન્યાને સતત નેપોટિઝમની ચર્ચાનો સામનો કરવો પડ્યો છે. પોતાના ફિલ્મી બેકગ્રાઉન્ડથી અંતર બનાવવાને બદલે તેમણે તેને સ્વીકારી લીધું છે. તેમણે કહ્યું, "મને લાગે છે કે પોતાના વિશેષાધિકારને સ્વીકારવાનો ઇનકાર કરવાનો કોઈ અર્થ નથી. મને મારા પિતા ચંકી પાંડેની દીકરી હોવા પર ખૂબ ગર્વ છે. મારા પિતાના નામ સાથે જોડાયેલા હોવા અંગે મારે કોઈ નકારાત્મક ભાવના નથી."

સોશિયલ મીડિયા પર થતી ટીકાઓ અને લોકોના અભિપ્રાયો વિશે વાત કરતાં અનન્યાએ કહ્યું કે તેઓ આ બાબતોથી પ્રભાવિત થયા વિના પોતાના કામ પર ધ્યાન આપે છે. તેમણે કહ્યું, "લોકો મારા વિશે ગમે તે વિચારતા હોય, હું દરરોજ સવારે ઊઠું છું અને ભગવાનનો આભાર માનું છું કે મને મારું સપનું જીવવાની તક મળી રહી છે."

અભિનેતા ચંકી પાંડેની પુત્રી અનન્યા પાંડેએ વર્ષ 2019માં ધર્મા પ્રોડક્શન્સની ફિલ્મ 'સ્ટુડન્ટ ઑફ ધ યર 2'થી અભિનય કારકિર્દીની શરૂઆત કરી હતી અને તે જ વર્ષે 'પતિ પત્ની ઔર વો'માં પણ જોવા મળ્યાં હતાં. આ બંને ફિલ્મો માટે તેમને 65મા ફિલ્મફેર અવૉર્ડ્સ (2020)માં 'બેસ્ટ ફીમેલ ડેબ્યૂ'નો પુરસ્કાર મળ્યો હતો.

ત્યારબાદ તેમણે 'ખાલી પીલી' (2020), 'ગહેરાઇયાં' (2022), હિન્દી-તેલુગુ ફિલ્મ 'લાઇગર' (2022) અને બૉક્સ ઑફિસ પર હિટ રહેલી 'ડ્રીમ ગર્લ 2' (2023) જેવી ફિલ્મોમાં કામ કર્યું. ડિજિટલ પ્લેટફોર્મ પર પણ તેમણે પોતાની ઓળખ બનાવી; તેમને 'ખો ગયે હમ કહાં' (2023) માટે ફિલ્મફેર ઓટીટી અવોર્ડ (ક્રિટિક્સ) અને પ્રાઇમ વિડિયોની સિરીઝ 'કૉલ મી બે' (2024) માટે બેસ્ટ એક્ટ્રેસ (કૉમેડી સિરીઝ)નો પુરસ્કાર મળ્યો, જ્યારે સાયબર-થ્રિલર 'કંટ્રોલ' (2024)માં પણ તેઓ મુખ્ય ભૂમિકામાં જોવા મળ્યાં.

વર્ષ 2025માં તેઓ 'કેસરી ચેપ્ટર 2' અને 'તૂ મેરી મૈં તેરા મૈં તેરા તૂ મેરી'માં જોવા મળ્યાં અને આ જ વર્ષે તેમને 'ફોર્બ્સ એશિયાની 30 અંડર 30' યાદીમાં પણ સામેલ કરવામાં આવ્યાં. વર્ષ 2026માં તેમણે રોમેન્ટિક ડ્રામા 'ચાંદ મેરા દિલ'માં કામ કર્યું અને હવે તેઓ 'કૉલ મી બે'ની બીજી સીઝનમાં જોવા મળશે.