અમરેલી જિલ્લાના બાબરા તાલુકાના મોટા દેવળિયા ગામે આવેલા ચેકડેમમાં ચાર યુવકોના ડૂબવાથી મોત થયું છે. ચારેય યુવકો નાહવા માટે પાણીમાં ઉતર્યા હતા અને ઊંડા પાણીમાં ડૂબી ગયા હતા.
ઘટના કેવી રીતે સામે આવી? ગામના ચેકડેમ ખાતે ચાર યુવકો નાહવા ઉતર્યા હતા. આ દરમિયાન ગણેશ વિસર્જન માટે ચેકડેમ પાસેથી પસાર થઈ રહેલા કેટલાક લોકોએ કાંઠા પર યુવકોના કપડાં અવાવરૂ પડેલા જોયા. શંકા જતાં તેમણે તરત જ બાબરા પોલીસને જાણ કરી.
માહિતી મળતાં જ પોલીસ કાફલો અને સ્થાનિક તરવૈયાઓ ઘટનાસ્થળે પહોંચ્યા. ભારે જહેમત બાદ ચેકડેમમાંથી ચારેય યુવકોના મૃતદેહ બહાર કાઢવામાં આવ્યા અને પોસ્ટમોર્ટમ માટે ખસેડવામાં આવ્યા. આ ઘટનાથી મોટા દેવળિયા સહિત સમગ્ર પંથકમાં શોકનું મોજું ફરી વળ્યું છે.
મૃતકોના નામ આ પ્રમાણે છે: કનુભાઈ દેવજીભાઈ શિંગાળા (મોટા દેવળિયા), સચિનભાઈ કાળુભાઈ શિંગાળા (મોટા દેવળિયા), ભલા પ્રવીણભાઈ જેઠવા (નવાગઢ, જેતપુર) અને કેવિન પ્રવીણભાઈ જેઠવા (નવાગઢ, જેતપુર).
અલગ ઘટના: રાજુલા તાલુકાના ચાંચબંદર દરિયાકાંઠે ગણેશ વિસર્જન દરમિયાન પણ એક દુર્ઘટના બની. ચાર યુવકો દરિયામાં ડૂબી ગયા હતા. સ્થાનિક લોકોની મદદથી ત્રણ યુવકોને બચાવી લેવાયા છે, જ્યારે વીરસિંહ ગુજરીયા નામનો એક યુવક હજુ લાપતા છે. ઘટનાની જાણ થતાં જ મામલતદાર, TDO અને પીપાવાવ મરીન પોલીસ સહિતનું તંત્ર ઘટનાસ્થળે પહોંચ્યું હતું.
લાપતા યુવકની શોધખોળ સ્થાનિક તરવૈયાઓ અને લોકોની મદદથી ચાલુ છે. પીપાવાવ ઇન્ડિયન કોસ્ટગાર્ડને પણ જાણ કરવામાં આવી છે, જેથી દરિયામાં શોધખોળ વધુ તેજ બની છે. આ ઘટનાથી ચાંચબંદર ગામ સહિત આસપાસના વિસ્તારમાં ચિંતાનો માહોલ છે.