બોલિવૂડ અભિનેત્રી અમીષા પટેલના માતા-પિતાના મુંબઈના ચર્ચગેટ સ્થિત ઘરમાંથી લગભગ 5 લાખ રૂપિયાના સોના અને હીરાના દાગીનાની ચોરી થઈ છે. આ કેસમાં મરીન ડ્રાઈવ પોલીસે ઘરમાં કામ કરતી 40 વર્ષીય મહિલાની ધરપકડ કરી છે. આરોપી 15 સપ્ટેમ્બર સુધી પોલીસ કસ્ટડીમાં રહેશે.
આ ઘટના અંગે અમીષા પટેલે ટાઈમ્સ ઓફ ઈન્ડિયા સાથેની વાતચીતમાં જણાવ્યું કે, 'ગઈકાલે મેં મારા માતા-પિતા સાથે ફોન પર એક કલાક વાત કરી. પોલીસે ચોરી કરનાર નોકરાણીની ધરપકડ કરી લીધી છે અને તે હાલ જેલમાં છે. તેણે ચોરીનો ગુનો કબૂલી લીધો છે. મને સૌથી વધુ રાહત એ વાતની છે કે મારો પરિવાર સુરક્ષિત છે અને કોઈને ઈજા પહોંચી નથી.'
અમીષાના ભાઈ અને અભિનેતા અશ્મિત પટેલે જણાવ્યું કે, 'અમારા ઘરે લગભગ એક વર્ષથી કામ કરતી હાઉસ હેલ્પે જાન્યુઆરીમાં ચોરી કરી હતી, પરંતુ અમે ફરિયાદ તાજેતરમાં જ નોંધાવી છે. મારા માતા-પિતાએ તેને ચોરી વિશે પૂછ્યું અને વિચારવા તથા દાગીના પાછા આપવાનો સમય પણ આપ્યો હતો, પરંતુ તેણે તેમ કર્યું નહીં.'
અશ્મિતે વધુમાં કહ્યું કે, 'દાગીનાની કિંમત લગભગ 5 લાખ રૂપિયા છે. તે એક વર્ષથી અમારા ઘરમાં કામ કરી રહી હતી, પરંતુ જૂનના અંતમાં તેણે નોકરી છોડી દીધી. પોલીસે તેની ધરપકડ કરી છે અને તપાસ ચાલુ છે.' ઉલ્લેખનીય છે કે અશ્મિત તેમના માતા-પિતા સાથે એક જ ઘરમાં રહે છે.
પોલીસના જણાવ્યા અનુસાર, આરોપીનું નામ સીમા ઘાટે છે અને તે પાલઘરની રહેવાસી છે. તે છેલ્લા એક વર્ષથી અમીષા પટેલના ઘરમાં કામ કરતી હતી. જાન્યુઆરી 2026માં ઘરમાંથી એક બંગડી ચોરાઈ ગઈ હતી, ત્યારથી અમીષાના માતા આશાને સીમા પર શંકા હતી.
તેમણે આગામી પાંચથી છ મહિના સુધી સીમાને ચોરી કબૂલ કરવા અને દાગીના પરત કરવા કહ્યું, પરંતુ તે સતત ચોરીનો ઈનકાર કરતી રહી અને બાદમાં નોકરી છોડી દીધી. થોડા સમય પહેલા જ અમીષાની માતાએ મરીન ડ્રાઈવ પોલીસ સ્ટેશનમાં અજાણી મહિલા સામે ફરિયાદ નોંધાવી હતી.
ફરિયાદ બાદ વરિષ્ઠ પોલીસ નિરીક્ષકના નિર્દેશ પર ક્રાઈમ ડિટેક્શન ટીમે તપાસ શરૂ કરી. ટીમે શંકાસ્પદ મહિલાને વિરારથી શોધી કાઢી અને તેને કસ્ટડીમાં લીધી. તેને કોર્ટમાં રજૂ કરવામાં આવી, જ્યાંથી 15 સપ્ટેમ્બર સુધી પોલીસ કસ્ટડી મંજૂર થઈ છે. પોલીસ ગુમ થયેલા દાગીના પાછા મેળવવાનો પ્રયાસ કરી રહી છે અને આરોપીનો પહેલાં કોઈ ગુનાહિત રેકોર્ડ છે કે નહીં તેની પણ તપાસ કરી રહી છે.
અમીષા પટેલે વર્ષ 2000માં હૃતિક રોશન સાથેની ફિલ્મ 'કહો ના... પ્યાર હૈ' થી અભિનયની શરૂઆત કરી હતી. આ રોમેન્ટિક થ્રિલર મોટી હિટ રહી અને તે રાતોરાત સ્ટાર બની ગઈ હતી. ત્યારબાદ તેમણે 'ગદર: એક પ્રેમ કથા', 'હમરાઝ', 'હનીમૂન ટ્રાવેલ્સ પ્રાઈવેટ લિમિટેડ', 'ભૂલ ભુલૈયા' અને 'રેસ 2' જેવી ઘણી હિટ ફિલ્મોમાં કામ કર્યું. વર્ષ 2023માં તેમણે 'ગદર 2' થી મોટા પડદા પર વાપસી કરી હતી.