અમદાવાદ મ્યુનિસિપલ કોર્પોરેશન (AMC)માં 180 પટ્ટાવાળાને આઉટસોર્સિંગ દ્વારા રાખવા માટે આશરે રૂ. 5 કરોડનું કામ ટેન્ડર પ્રક્રિયા વિના ત્રણ એજન્સીઓને આપવાની તૈયારી છે. આ દરખાસ્ત બુધવારે મળનારી સ્થાયી સમિતિની બેઠકમાં રજૂ થવાની શક્યતા છે.
દરખાસ્ત મુજબ, એજન્સીઓને કરારપત્ર ભરવા અને ડિપોઝિટ જમા કરાવવામાંથી પણ મુક્તિ આપવાની જોગવાઈ રાખવામાં આવી છે. મ્યુનિસિપલ કોર્પોરેશનમાં 15 હજારથી વધુ કર્મચારીઓ હોવા છતાં વિવિધ વિભાગોમાં પટ્ટાવાળાની અછત હોવાનું કારણ આગળ ધરીને આ નિર્ણય લેવાઈ રહ્યો છે.
દરખાસ્ત અનુસાર, 180 પટ્ટાવાળાની સેવા આગામી એક વર્ષ માટે ત્રણ એજન્સીઓ પાસેથી લેવાની યોજના છે. દરેક એજન્સી પાસેથી 60 પટ્ટાવાળા મેળવવાનું આયોજન છે.
આ માટે 22 ઓગસ્ટ, 2025ના રોજ હેલ્થ એન્ડ સોલિડ વેસ્ટ મેનેજમેન્ટ કમિટીમાં મંજૂર થયેલા ઠરાવનો આધાર લેવામાં આવ્યો છે. તે સમયે રૂ. 6.13 કરોડના ખર્ચે 164 પટ્ટાવાળા અને રૂ. 16 કરોડના ખર્ચે 288 પટ્ટાવાળા બે વર્ષ માટે આઉટસોર્સિંગથી મેળવવાની બે અલગ દરખાસ્તો મંજૂર થઈ હતી.
આ ગણતરી મુજબ એક પટ્ટાવાળા પાછળ વાર્ષિક રૂ. 2.77 લાખનો ખર્ચ થાય છે, એટલે કે માસિક આશરે રૂ. 23,150નો ખર્ચ ગણવામાં આવ્યો છે. જોકે, આટલી રકમ ખરેખર પટ્ટાવાળાને પગારરૂપે ચૂકવાય છે કે નહીં તે અંગે પણ સવાલ ઊભો થયો છે. અહેવાલ મુજબ, પટ્ટાવાળાઓને સામાન્ય રીતે રૂ. 12 હજારથી રૂ. 15 હજાર સુધીનો માસિક પગાર મળતો હોવાની ચર્ચા છે. બાકીની રકમ એજન્સી પાસે રહેતી હોવાના આક્ષેપો પણ થઈ રહ્યા છે.
જૂના ઠરાવમાં અલ્ટ્રામોર્ડન, ક્લીન ઇન્ડિયા અને શાશ્વત સાફ્લ્ય પ્રા. લિ.નાં નામ સામેલ હતાં. નવી દરખાસ્ત મુજબ, ત્રણેય એજન્સીઓને 60-60 પટ્ટાવાળા પૂરા પાડવાના રહેશે. દરેક એજન્સીના 9 કર્મચારીઓ સેક્રેટરી ઓફિસમાં અને 51 કર્મચારીઓ અન્ય ખાતામાં ફાળવાશે. આ સેવાઓ માટેનો વર્ક ઓર્ડર અને પગાર સંબંધિત ખાતામાંથી ચૂકવાશે. હવે સ્થાયી સમિતિ આ દરખાસ્તને મંજૂરી આપે છે કે નહીં તેના પર સૌની નજર છે.