બનાસકાંઠા જિલ્લાના પ્રસિદ્ધ શક્તિપીઠ અંબાજી ખાતે ભાદરવી પૂનમનો મહામેળો ભક્તિભાવના માહોલમાં ચાલી રહ્યો છે. દેશભરમાંથી મોટી સંખ્યામાં શ્રદ્ધાળુઓ અહીં પહોંચી રહ્યા છે.
મેળાના પ્રથમ ત્રણ દિવસમાં કુલ 15.85 લાખ શ્રદ્ધાળુઓએ માતાજીના દર્શન કર્યા છે. પહેલા બે દિવસમાં દરરોજ ચાર લાખ જેટલા ભક્તો આવ્યા હતા. ત્રીજા દિવસે સાંજના પાંચ વાગ્યા સુધીમાં સાત લાખથી વધુ શ્રદ્ધાળુઓએ દર્શન કર્યા હતા.
ત્રીજા દિવસે એક જ દિવસમાં શિખર પર 705 વાર ધજારોહણ થયું. એટલે દર એક મિનિટે એક ધજા ચડી હોવાનું નોંધાયું છે. આ ત્રણ દિવસમાં કુલ 1,515 ધજાઓ ચડાવવામાં આવી છે.
શ્રદ્ધાળુઓને મોહનથાળની પ્રસાદીના 13.08 લાખ પેકેટ અને ચીકીના 16,000 પેકેટ વિતરિત કરવામાં આવ્યા છે. ભેટ કાઉન્ટર અને ધાર્મિક સાહિત્ય કેન્દ્રને આ દિવસોમાં રૂ. 88.56 લાખની આવક થઈ છે.
ભારે ભીડને ધ્યાનમાં રાખીને તંત્ર દ્વારા શ્રદ્ધાળુઓ માટે વિશેષ વ્યવસ્થા કરવામાં આવી છે. 30,000 જેટલા શ્રદ્ધાળુઓએ ઉડનખટોલા દ્વારા ગબ્બર સુધીની યાત્રા કરી છે.
આ ત્રણ દિવસમાં મેળામાં 86,810 શ્રદ્ધાળુઓને તબીબી સારવાર લેવી પડી હતી. ભીડમાં ગુમ થયેલા 61,075 બાળકોને શોધીને તેમના પરિવારજનો સાથે મિલાવવામાં આવ્યા હતા.
પદયાત્રા પૂર્ણ કરીને વિવિધ સંઘો પણ હવે ધીમે ધીમે મંદિરે પહોંચી રહ્યા છે. સમગ્ર મેળામાં શિસ્તબદ્ધ અને ભક્તિભર્યો માહોલ જોવા મળી રહ્યો છે.