બનાસકાંઠા જિલ્લામાં આવેલા યાત્રાધામ અંબાજીમાં ભાદરવી પૂનમના મહામેળાનો આજે ત્રીજો દિવસ છે. મંદિર પરિસરથી લઈને અંબાજી તરફ જતા તમામ માર્ગો પર લાખો ભક્તોનો મેળાવડો જામ્યો છે. આખું ધામ 'જય અંબે'ના નાદથી ગૂંજી ઉઠ્યું છે.
મંદિર પ્રશાસનના જણાવ્યા અનુસાર, છેલ્લા બે દિવસમાં 8.63 લાખથી વધુ શ્રદ્ધાળુઓએ મા અંબાના દર્શન કર્યા છે. એક જ દિવસમાં 4.25 લાખથી વધુ ભક્તોએ દર્શનનો લાભ લીધો હતો.
દેશ-વિદેશમાંથી આવતા પદયાત્રીઓ અને શ્રદ્ધાળુઓની સુવિધા માટે વહીવટીતંત્ર દ્વારા વ્યાપક વ્યવસ્થા કરવામાં આવી છે. મંદિર પરિસરમાં પીવાનું પાણી, આરોગ્ય સેવાઓ, વિશ્રામ સ્થળો અને મહાપ્રસાદની સગવડ ઉપલબ્ધ કરાવવામાં આવી છે, જેથી પગપાળા આવતા ભક્તોને કોઈ તકલીફ ન પડે.
દર્શન અને આરતીનો સમય જાણવો ભક્તો માટે જરૂરી છે. 16 જુલાઈથી લાગુ થયેલા નવા સમયપત્રક મુજબ:
સવારે આરતી: 6થી 6.30 વાગ્યા સુધી
સવારે દર્શન: 6.30થી 11.30 વાગ્યા સુધી
બપોરે દર્શન: 12.30થી સાંજે 5 વાગ્યા સુધી
સાંજે આરતી: 7થી 7.30 વાગ્યા સુધી
સાંજે દર્શન: 7.30થી રાત્રે 12 વાગ્યા સુધી
આ મેળો માત્ર ધાર્મિક આસ્થાનું કેન્દ્ર નહીં, પણ ભક્તિ, એકતા અને સામાજિક સમરસતાનું પ્રતીક છે. પૂનમ સુધી ભક્તોનો આ મહેરામણ અવિરત ચાલુ રહેવાની ધારણા છે.