બાંગ્લાદેશના 29 વર્ષીય ઓફ-સ્પિનર એલિસ અલ ઇસ્લામની વનડે કારકિર્દી શરૂ થતાં જ વિવાદમાં ઘેરાઈ છે. શારજાહમાં અફઘાનિસ્તાન સામેની ડેબ્યૂ મેચમાં તેની બોલિંગ એક્શન સામે મેચ ઓફિશિયલ્સે શંકા વ્યક્ત કરી છે. ICCએ હવે તેની બોલિંગ એક્શનની સ્વતંત્ર તપાસનો આદેશ આપ્યો છે. જ્યાં સુધી ટેસ્ટનો અંતિમ નિર્ણય ન આવે ત્યાં સુધી એલિસ આંતરરાષ્ટ્રીય ક્રિકેટમાં બોલિંગ ચાલુ રાખી શકશે.
એલિસ અલ ઇસ્લામે 21 ઓક્ટોબરના રોજ અફઘાનિસ્તાન સામે પોતાની પ્રથમ વનડે મેચ રમી હતી. આ મુકાબલામાં તેણે 8.3 ઓવરમાં 47 રન આપ્યા હતા, પરંતુ તેને એક પણ વિકેટ મળી શકી નહોતી. અફઘાનિસ્તાન સામે બાંગ્લાદેશની સાત વિકેટે હાર થઈ હતી, જે ઝિમ્બાબ્વે સામેની હાર બાદ ટ્રાઈ-સીરિઝમાં ટીમની સતત બીજી હાર હતી. ટીમની આ નિરાશાજનક સ્થિતિ વચ્ચે અમ્પાયર્સ અને મેચ રેફરીએ એલિસ દ્વારા બોલ ફેંકતી વખતે કોણી સીધી થવા અંગે પ્રશ્નો ઉઠાવતા આઈસીસીને શંકાસ્પદ એક્શનનો રિપોર્ટ સોંપ્યો હતો.
આઈસીસીના નિયમો અનુસાર બોલિંગ કરતી વખતે બોલ રીલિઝ થવા સુધી બોલરની કોણી 15 ડિગ્રીથી વધુ સીધી થવી જોઈએ નહીં. એલિસ અલ ઇસ્લામની બોલિંગનું મૂલ્યાંકન આઈસીસી માન્યતા પ્રાપ્ત ટેસ્ટિંગ સેન્ટરમાં હાઈ-સ્પીડ કેમેરા, 3D મોશન સેન્સર્સ અને ખાસ સોફ્ટવેરની મદદથી કરવામાં આવશે.
જોકે, માત્ર શંકાસ્પદ એક્શનનો રિપોર્ટ થવાનો અર્થ એવો નથી કે ખેલાડી દોષિત સાબિત થઈ ગયો છે. જ્યાં સુધી લેબ ટેસ્ટિંગનો અંતિમ નિર્ણય ન આવે ત્યાં સુધી એલિસ આંતરરાષ્ટ્રીય ક્રિકેટમાં બોલિંગ કરવાનું ચાલુ રાખી શકશે.
એલિસ અલ ઇસ્લામ સ્થાનિક ક્રિકેટ અને ફ્રેન્ચાઈઝી લીગમાં પોતાની મિસ્ટ્રી સ્પિન અને કેરમ બોલની વિવિધતા માટે જાણીતો છે. તેણે બાંગ્લાદેશ પ્રીમિયર લીગ (BPL)માં 35 મેચોમાં 39 વિકેટો ઝડપી છે, જ્યારે લિસ્ટ-એ ક્રિકેટમાં 20 મેચોમાં 35 વિકેટ તેના નામે નોંધાયેલી છે, જેમાં 21 રન આપીને 6 વિકેટ તેનું સર્વશ્રેષ્ઠ પ્રદર્શન રહ્યું છે. તેણે તાજેતરમાં ઐચી-નાગોયા એશિયન ગેમ્સમાં શ્રીલંકા સામે ટી20 ઇન્ટરનેશનલ ડેબ્યૂ પણ કર્યું હતું. હવે વનડે ડેબ્યૂમાં જ એક્શન સામે પ્રશ્નો ઊભા થતાં તેની આંતરરાષ્ટ્રીય કારકિર્દી આ ટેસ્ટના પરિણામો પર નિર્ભર રહેશે.