વિદેશથી ભારત આવતા તમામ મુસાફરો માટે નાગરિક ઉડ્ડયન મંત્રાલય અને આરોગ્ય મંત્રાલયે નવી એડવાઈઝરી જાહેર કરી છે. તેમણે 'એર સુવિધા 2.0' પોર્ટલ પર સેલ્ફ-ડિક્લેરેશન (સ્વયં-ઘોષણા) ફોર્મ ભરવાનું ફરીથી ફરજિયાત બનાવ્યું છે. આ નિર્ણય ઇબોલા જેવા વૈશ્વિક સ્વાસ્થ્ય જોખમોને ધ્યાનમાં રાખીને લેવામાં આવ્યો છે. સરકારે મુસાફરોને નકલી વેબસાઇટ્સથી સાવધાન રહેવાની ચેતવણી પણ આપી છે.
કોવિડ-19 મહામારી દરમિયાન આંતરરાષ્ટ્રીય મુસાફરોના સ્વાસ્થ્ય પર નજર રાખવા માટે 'એર સુવિધા' પોર્ટલ શરૂ કરવામાં આવ્યું હતું. સ્થિતિ સામાન્ય થતાં નવેમ્બર 2022માં ફોર્મ ભરવાનો નિયમ બંધ કરી દેવામાં આવ્યો હતો. હવે ઇબોલા વાયરસ અને અન્ય વૈશ્વિક સ્વાસ્થ્ય જોખમો સામે સતર્કતા અને ટ્રેકિંગ જાળવવા માટે આ પોર્ટલને 'એર સુવિધા 2.0' તરીકે ફરીથી સક્રિય કરવામાં આવ્યું છે.
નવી ગાઈડલાઈન મુજબ, વિદેશથી ભારત આવતા તમામ મુસાફરોએ આ ફોર્મ ભરવું અનિવાર્ય છે. આ નિયમ ભારતીય પાસપોર્ટ ધારકો, OCI કાર્ડધારકો અને વિદેશી પાસપોર્ટ ધરાવતા અન્ય તમામ મુસાફરોને લાગુ પડે છે. મુસાફરોએ ફ્લાઈટમાં બોર્ડિંગ પહેલાં અથવા ભારતમાં ઉતરાણના મહત્તમ 72 કલાક સુધીમાં ઓનલાઈન ફોર્મ સબમિટ કરવાનું રહેશે. ફોર્મમાં વ્યક્તિગત વિગતો, પાસપોર્ટ નંબર, ફ્લાઈટની માહિતી, તાજેતરના પ્રવાસ અને સ્વાસ્થ્ય સંબંધિત સાચી માહિતી આપવાની રહેશે.
નાગરિક ઉડ્ડયન મંત્રાલયે સ્પષ્ટ કર્યું છે કે 'એર સુવિધા 2.0' ફોર્મ ભરવા માટે સરકાર કોઈ ચાર્જ કે ફી લેતી નથી. આ સેવા સંપૂર્ણપણે મફત છે. તેમ છતાં, કેટલાક સાયબર ઠગ એર સુવિધા જેવી દેખાતી નકલી વેબસાઇટ્સ બનાવીને મુસાફરો પાસેથી 'પ્રોસેસિંગ ફી' કે 'સર્વિસ ચાર્જ'ના નામે પૈસા પડાવી રહ્યા છે. મંત્રાલયે મુસાફરોને આવી કોઈ પણ અજાણી કે શંકાસ્પદ વેબસાઇટ પર પોતાની અંગત વિગતો શેર ન કરવા અને પેમેન્ટ ન કરવા સૂચના આપી છે.
સરકારે મુસાફરોને છેતરપિંડીથી બચવા માટે માત્ર અધિકૃત વેબસાઇટ airsuvidha.civilaviation.gov.inનો જ ઉપયોગ કરવાની સલાહ આપી છે. આંતરરાષ્ટ્રીય પ્રવાસીઓને વિનંતી કરવામાં આવી છે કે એરપોર્ટ પર બોર્ડિંગ કે ઇમિગ્રેશન વખતે અગવડતા કે વિલંબથી બચવા માટે પ્રસ્થાન પહેલાં જ અધિકૃત પોર્ટલ પરથી ફોર્મ ભરીને તેની એક્નોલેજમેન્ટ કોપી (ડિજિટલ/હાર્ડ કોપી) પોતાની સાથે રાખવી.