ફુકેટથી દિલ્હી આવતી એર ઈન્ડિયાની ફ્લાઈટ AI2379 ઓડિશાના આકાશમાં અચાનક 300 ફૂટ નીચે આવી ગઈ હતી. આ ઘટનામાં 20 મુસાફરો અને 4 ક્રૂ મેમ્બર્સ ઘાયલ થયા હતા.
એરક્રાફ્ટ એક્સિડન્ટ ઇન્વેસ્ટિગેશન બ્યુરો (AAIB)ની પ્રાથમિક તપાસમાં બહાર આવ્યું છે કે આ ઘટના સમયે વિમાનના પાઈલટનો સાયકોએક્ટિવ (નશીલા) પદાર્થનો ટેસ્ટ પોઝિટિવ આવ્યો હતો. મીડિયા અહેવાલો મુજબ, આ ટેસ્ટથી સ્પષ્ટ થયું કે પાઈલટે ગાંજાનું સેવન કર્યું હતું.
ફ્લાઈટ દિલ્હી એરપોર્ટ પર લેન્ડ થયા બાદ નિયમ મુજબ ક્રૂ મેમ્બર્સનું મેડિકલ પરીક્ષણ કરવામાં આવ્યું હતું. બ્રેથ-એનાલાઈઝર તપાસમાં રિપોર્ટ નોર્મલ આવ્યો હતો, પરંતુ સાયકોએક્ટિવ સબસ્ટન્સ ડિટેક્શન કિટ દ્વારા કરાયેલા ટેસ્ટમાં ગડબડ સામે આવી હતી. ત્યારબાદ લેવાયેલા બ્લડ સેમ્પલના રિપોર્ટમાં પણ આ વાતની પુષ્ટિ થઈ હતી.
ઘટના સમયે વિમાનમાં કુલ 145 લોકો સવાર હતા, જેમાં 3 બાળકો સહિત 137 મુસાફરો, 6 કેબિન ક્રૂ અને 2 ફ્લાઈટ ક્રૂ સભ્યોનો સમાવેશ થતો હતો. ફ્લાઈટ અચાનક નીચે ફેંકાતાં ઓછામાં ઓછા 20 મુસાફરો અને 4 ક્રૂ મેમ્બર્સને નાની-મોટી ઈજાઓ પહોંચી હતી. શરૂઆતમાં એવું જણાવવામાં આવ્યું હતું કે વિમાન ખરાબ હવામાન કે ટર્બ્યુલન્સમાં ફસાયું હતું, પરંતુ હવે તપાસમાં પાઈલટના નશામાં હોવાની બાબત સામે આવી છે.
હાલ આ સમગ્ર મામલાની ટેકનિકલ અને અન્ય પાસાઓ પરથી ઊંડાણપૂર્વક તપાસ ચાલી રહી છે.