અમદાવાદ-વડોદરા એક્સપ્રેસ હાઈવે પર સોમવારે એક લક્ઝરી બસ અને ટ્રક વચ્ચે થયેલી ટક્કરમાં પાંચ લોકોના મોત થયા છે. સાઈદર્શન ટ્રાવેલ્સની બસ સુરતથી રાજસ્થાન જઈ રહી હતી ત્યારે આ અકસ્માત થયો. હાઈવે પર અફરાતફરીનો માહોલ સર્જાયો હતો. ઘટનાની જાણ થતાં જ પોલીસ અને ૧૦૮ એમ્બ્યુલન્સની ટીમો ઘટનાસ્થળે પહોંચી ગઈ હતી અને ઈજાગ્રસ્તોને નજીકની હોસ્પિટલમાં ખસેડવામાં આવ્યા હતા.
આ ઉપરાંત, ગીર ગઢડાના બેડીયા ગામે પૂરઝડપે આવતી એસટી બસ અને ટ્રક વચ્ચે થયેલી અકસ્માતમાં બે લોકોના મોત થયા છે, જ્યારે ૧૪ લોકો ઈજાગ્રસ્ત થયા છે. બસના ડ્રાઈવરની હાલત ગંભીર હોવાનું જાણવા મળે છે.
બીજી તરફ, ગુજરાત હાઈકોર્ટે આસારામને મોટો ઝટકો આપ્યો છે. આસારામની હંગામી જામીન અરજી હાઈકોર્ટે ફગાવી દીધી છે.
અમદાવાદની નિરમા યુનિવર્સિટીની ગર્લ્સ હોસ્ટેલમાં કામ કરતા એક શ્રમિકે વિદ્યાર્થિનીઓ સામે બીભત્સ વર્તન કર્યું હતું. વિદ્યાર્થિનીઓએ આ ઘટનાનો વીડિયો ઉતારીને હોસ્ટેલ સત્તાવાળાઓને જાણ કરી હતી. પીઆઈએ જણાવ્યું કે શ્રમિકની ઓળખ કરીને ગુનો નોંધવામાં આવશે.
રાજકોટ સિવિલ હોસ્પિટલમાં તંત્રની ભૂલના કારણે મૃતદેહ બદલાઈ જવાની ઘટના સામે આવી છે. અંતિમ સંસ્કાર પણ થઈ ગયા બાદ આ ભૂલ સામે આવી, જેથી પરિવારજનોમાં ભારે રોષ ફેલાયો છે. અમેરિકાથી આવેલી દીકરી પિતાના અંતિમ દર્શન પણ ન કરી શકી.
તાલાલા ગીરમાં બપોર બાદ મેઘરાજાએ મૂશળધાર વરસાદ કર્યો હતો. ચોમાસાની વિદાય પહેલા થયેલા આ વરસાદથી ખેડૂતો ખુશખુશાલ થઈ ગયા છે. જો કે, રાજ્યમાં હજુ ૧૧ ટકા વરસાદની ઘટ છે.
આ ઉપરાંત, સુરતના સાંસદ મુકેશ દલાલે ગરબામાં સનાતન ધર્મના લોકોને જ પ્રવેશ આપવાની અપીલ કરી છે. તેમણે આયોજકોને ખેલૈયાના ID ચેક કરવા અને 'રેન્ટ એ પાર્ટનર' સ્કીમને લઈ તપાસની માગ કરી છે. રાજકોટમાં સનાતન યુવા કથામાં ટાઈગર રાજા સિંહે હિન્દુઓની વસ્તી ઘટી રહી હોવાનો દાવો કરીને 'હમ-દો હમારે-દો' કાયદો લાવવાની માગ કરી છે. તેમણે કહ્યું કે ગુજરાતીઓ મીઠા છે પણ સમય આવે કોઈને છોડતા નથી.
આ ઉપરાંત, GPSCમાં સભ્ય પદે શિશિર ત્રિવેદીની નિમણૂકને લઈને વિવાદ ઉભો થયો છે. કોંગ્રેસે નિમણૂક રદ કરવાની માગ કરી છે. શિશિર ત્રિવેદી ભાજપના સક્રિય સભ્ય અને RSS સાથે જોડાયેલા હોવાનું કહેવાય છે.