અમદાવાદમાં એમ.જે. લાઇબ્રેરી નજીક 10 ઓક્ટોબરે ચાલી રહેલા દેખાવને કવર કરી રહેલા પત્રકારો અને પોલીસ વચ્ચે તણાવ સર્જાયો હતો. આ દરમિયાન એક મહિલા રિપોર્ટરને પોલીસે બળજબરીપૂર્વક ડિટેન્શન વાન તરફ લઈ જવાનો પ્રયાસ કર્યો હતો, જેની અન્ય પત્રકારોએ તાત્કાલિક દરમિયાનગીરી કરીને અટકાવ્યો હતો.
મળતી માહિતી અનુસાર, મહિલા રિપોર્ટર ઘટનાસ્થળેથી રિપોર્ટિંગ કરી રહી હતી ત્યારે મહિલા પોલીસ કર્મચારીઓએ તેને પકડીને વાન તરફ લઈ જવાનો પ્રયાસ કર્યો હતો. અન્ય પત્રકારોએ પોતાના કેમેરા અને માઇક્રોફોન સહિતના અધિકૃત બ્રોડકાસ્ટિંગ સાધનો બતાવીને તેઓ મીડિયા સાથે સંકળાયેલા હોવાની ઓળખ આપી હતી. ત્યારબાદ મહિલા રિપોર્ટરને પોલીસની પકડમાંથી છોડવામાં આવી હતી.
જો કે, પછી કેટલાક પોલીસ કર્મચારીઓએ રિપોર્ટરોને ઘેરી લીધા હતા અને તાત્કાલિક પ્રેસ કાર્ડ રજૂ કરવાની માંગ કરી હતી. પ્રેસ કાર્ડ ન બતાવવામાં આવે તો અટકાયત કરવાની ચેતવણી પણ આપવામાં આવી હોવાનો આક્ષેપ થયો હતો. ઘટનાસ્થળે સર્જાયેલા તણાવ વચ્ચે રિપોર્ટિંગ ટીમે પરિસ્થિતિ સંભાળી હતી અને આખરે પોલીસની કસ્ટડીમાં લીધા વિના સ્થળ પરથી બહાર નીકળવામાં સફળ રહી હતી.
આ ઘટના દેશભરમાં પોલીસ અને મીડિયા વચ્ચે વધતા ઘર્ષણના વ્યાપક સંદર્ભમાં સામે આવી છે. દિલ્હીમાં સીજેપીના દેખાવોને પગલે રાજધાની છાવણીમાં ફેરવાઈ ગઈ હતી અને પોલીસે 2000થી વધુ દેખાવકારોની અટકાયત કરી હતી. આ પડઘા ગુજરાતમાં પણ પડ્યા હતા.
નવી દિલ્હીમાં પણ ચૂંટણી પંચ વિરુદ્ધના યુવા પ્રદર્શનને કવર કરી રહેલા કેટલાક મીડિયા કર્મચારીઓની અટકાયત કરવામાં આવી હોવાના અહેવાલો સામે આવ્યા હતા. તેમાં નવભારત ટાઇમ્સ ઉપરાંત સ્ક્રોલ.ઇન અને ન્યૂઝલોન્ડ્રી જેવા ડિજિટલ મીડિયા સંગઠનોના પત્રકારોનો પણ સમાવેશ થતો હોવાના અહેવાલ છે. કેટલાક કિસ્સામાં પત્રકારોએ પોતાની પ્રેસ ઓળખ દર્શાવ્યા હોવા છતાં તેમને ડિટેન્શન બસમાં બેસાડવામાં આવ્યા હોવાના આક્ષેપો થયા હતા. જેના પગલે ફરજ બજાવી રહેલા મીડિયા કર્મચારીઓ સામે પોલીસની કાર્યવાહી અંગે સવાલો ઊભા થયા છે.