અમદાવાદના મકરબા વિસ્તારમાં નવનિર્મિત રેલવે ઓવરબ્રિજની ડિઝાઇનમાં ખામી સામે આવ્યા બાદ અમદાવાદ મ્યુનિસિપલ કોર્પોરેશન (AMC)એ કાર્યવાહી શરૂ કરી છે. AMCએ બ્રિજની ડિઝાઇન તૈયાર કરનાર કંપની ‘ડેલ્ફ કન્સલ્ટન્સી’ને નોટિસ ફટકારી છે.
નોટિસમાં ડિઝાઇન અંગે ખુલાસો માંગવામાં આવ્યો છે અને બ્રિજના છેડા પર ટ્રાફિક વ્યવસ્થામાં સર્જાયેલી સમસ્યા અંગે જવાબ રજૂ કરવા જણાવાયું છે. ડિઝાઇન તૈયાર કરતી વખતે ટ્રાફિક ફ્લો અને કનેક્ટિવિટીને ધ્યાનમાં લેવામાં આવી હતી કે નહીં તે અંગે પણ સ્પષ્ટતા માંગવામાં આવી હોવાનું સામે આવ્યું છે.
અમદાવાદ-બોટાદ રેલવે લાઇન પર એસજી હાઈવે અને જુહાપુરાને જોડતા આ ઓવરબ્રિજનું ઈ-લોકાર્પણ મુખ્યમંત્રીના હસ્તે કરવામાં આવ્યું હતું. બ્રિજનો હેતુ વાહનચાલકોને સરળ અને ઝડપી અવરજવર પૂરી પાડવાનો હતો, પરંતુ શરૂ થયા બાદ તેના છેડા પર આવેલા ચાર રસ્તા અને સમગ્ર ટ્રાફિક વ્યવસ્થાની ડિઝાઇનમાં ગંભીર ખામી સામે આવી છે. પરિણામે ટ્રાફિક જામ અને અવ્યવસ્થાની સ્થિતિ સર્જાતા તંત્ર સામે સવાલો ઉઠ્યા છે.
મકરબા રેલવે ઓવરબ્રિજના છેડા પર ચાર રસ્તા તરફની ટ્રાફિક વ્યવસ્થા યોગ્ય રીતે ગોઠવવામાં ન આવી હોવાના કારણે વાહનોની અવરજવરમાં અડચણ ઊભી થઈ રહી છે. બ્રિજ પરથી નીચે ઉતર્યા બાદ વાહનોની અવરજવર અને ક્રોસિંગને કારણે ટ્રાફિકનું ભારણ વધતું જોવા મળ્યું હતું. નવી સુવિધા શરૂ થયા બાદ ટ્રાફિક સરળ થવાના બદલે સમસ્યા વધતાં બ્રિજની ડિઝાઇન અને પ્લાનિંગ સામે સવાલો ઉઠ્યા છે.
બ્રિજના ઈ-લોકાર્પણના બીજા જ દિવસે ટ્રાફિકની સ્થિતિને ધ્યાનમાં રાખીને કોર્પોરેટ રોડના મુખ્ય માર્ગને બંધ કરીને વાહનચાલકો માટે ડાયવર્ઝન આપવામાં આવ્યું હતું. અચાનક મુખ્ય રોડ બંધ કરી દેવાતા આ માર્ગ પરથી અવરજવર કરતા વાહનચાલકોને વૈકલ્પિક રસ્તાઓનો ઉપયોગ કરવાની ફરજ પડી રહી છે. જેના કારણે સ્થાનિક રહેવાસીઓ ઉપરાંત રોજિંદા વાહનચાલકોની મુશ્કેલીમાં વધારો થયો છે. બ્રિજના લોકાર્પણ બાદ તાત્કાલિક ટ્રાફિક વ્યવસ્થામાં ફેરફાર કરવાની ફરજ પડતાં આયોજન સામે પણ પ્રશ્નો ઊભા થયા છે.
મુખ્ય રોડ બંધ કર્યા બાદ બ્રિજની નીચે રેલવે ફાટક નજીક વાહનચાલકો માટે યુ-ટર્નની વ્યવસ્થા કરવામાં આવી છે. જોકે, આ વ્યવસ્થાના કારણે પણ વાહનોની અવરજવરમાં ગૂંચવણ સર્જાઈ રહી હોવાની ફરિયાદો સામે આવી છે. બ્રિજના નિર્માણ પહેલાં ટ્રાફિકના ભારણ અને ભવિષ્યની અવરજવરને ધ્યાનમાં રાખીને પૂરતું આયોજન કરવામાં આવ્યું હતું કે નહીં તે મુદ્દો પણ ચર્ચામાં આવ્યો છે.
મકરબા રેલવે ઓવરબ્રિજનું નિર્માણ એસજી હાઈવે અને જુહાપુરા વિસ્તાર વચ્ચેની અવરજવર સરળ બનાવવા માટે કરવામાં આવ્યું હતું. પરંતુ બ્રિજના લોકાર્પણ બાદ જ ટ્રાફિક જામ, મુખ્ય રોડ બંધ કરવાની ફરજ અને ડાયવર્ઝન જેવી સ્થિતિ સર્જાતા પ્રોજેક્ટના આયોજન પર સવાલો ઊભા થયા છે. હવે AMCની નોટિસ બાદ કન્સલ્ટન્સી કંપની તરફથી શું ખુલાસો આપવામાં આવે છે અને બ્રિજની ડિઝાઇનમાં રહેલી ખામીને દૂર કરવા માટે કયા પગલાં લેવામાં આવે છે તેના પર સૌની નજર છે.