અમદાવાદમાં એક ચોંકાવનારો કિસ્સો સામે આવ્યો છે, જેમાં એક ભાઈ અને પિતાએ મળીને 22 વર્ષની યુવતીની હત્યા કરી અને તેને અકસ્માત ગણાવવાનો પ્રયાસ કર્યો. પોલીસે 3 મહત્વપૂર્ણ કડીઓના આધારે આ રહસ્ય ઉકેલ્યું છે.
ઘટના 12 ઓગસ્ટની રાત્રે બની હતી. 38 વર્ષીય મોહમ્મદ હાબીલ અને તેની 22 વર્ષની બહેન સોફિયા ઘાયલ હાલતમાં સોલા સિવિલ હોસ્પિટલમાં લાવવામાં આવ્યા હતા. થોડા સમય બાદ સોફિયાનું મોત થયું. અમદાવાદના એમ ડિવિઝન ટ્રાફિક શાખાના સ્ટાફે હાબીલનું નિવેદન નોંધ્યું, જેમાં તેણે જણાવ્યું કે તે તેની બહેનને શેલાની નિક્કી હોસ્પિટલમાંથી લેવા ગયો હતો અને પાછા ફરતી વખતે ઘેલજીપુરા રસ્તા પર એક અજાણ્યા વાહને બાઇકને પાછળથી ટક્કર મારી હતી.
પોલીસ ઇન્સ્પેક્ટર ઉમેશ ધાખડાની આગેવાનીમાં તપાસ શરૂ થઈ. હાબીલને અલગ-અલગ દિવસે બોલાવીને પૂછપરછ કરવામાં આવી, ત્યારે તેના નિવેદનોમાં વિસંગતતા જણાઈ. પોલીસને શંકા ગઈ અને તેઓએ ઘટના સ્થળે સીસીટીવી ફૂટેજ તપાસ્યા. જોકે, ત્યાં કોઈ અકસ્માતના દ્રશ્યો મળ્યા નહીં.
ત્યારબાદ પોલીસે નિક્કી હોસ્પિટલના સીસીટીવી તપાસ્યા, જ્યાં સોફિયા કામ કરતી હતી. હોસ્પિટલમાં 12 ઓગસ્ટની રાત્રે સોફિયા રેઈનકોટ પહેરીને બહાર નીકળતી દેખાઈ. પછી નજીકના બિલ્ડીંગ 'સન એટમોસ્ફીયર કોમર્શિયલ'માં શ્રીરામ કિચનવેરની દુકાનના સીસીટીવી ફૂટેજ ચેક કર્યા, જેમાં ઘટસ્ફોટ થયો. ફૂટેજમાં સોફિયાને લેવા માટે તેનો ભાઈ હાબીલ આવ્યો હતો, પણ તેની સાથે હેલ્મેટ પહેરેલો એક માણસ પણ હતો, જે સોફિયાના પિતા ફારૂકભાઈ હતા.
પોલીસે હાબીલની કડક પૂછપરછ કરતાં તેણે કબૂલ કર્યું કે સોફિયાનું અકસ્માતમાં મોત નથી થયું, પરંતુ તેમણે તેની હત્યા કરી છે. પોલીસના જણાવ્યા અનુસાર, પિતા અને ભાઈએ મળીને 3 મહિના પહેલાંથી આ હત્યાનો પ્લાન બનાવ્યો હતો. હાલ આરોપીઓની ધરપકડ કરવામાં આવી છે અને વધુ તપાસ ચાલુ છે.