અમદાવાદમાં સાચી નવરાત્રિના ગરબા આયોજનને લઈને ગંભીર સવાલો ઊભા થયા છે. ફાયર વિભાગની NOC (અનાપત્તિ પ્રમાણપત્ર) વિના જ AC ડોમમાં હજારો લોકોની હાજરીમાં ગરબાનું આયોજન કરવામાં આવ્યું હોવાનો આક્ષેપ છે. આ આયોજનમાં જાણીતા લોકગાયક જીગદાન ગઢવીના ગરબાનું પણ આયોજન થયું હતું. એક તરફ આયોજકો દ્વારા લાખો રૂપિયાના પાસ વેચીને કમાણી કરવામાં આવી હોવાના આક્ષેપો થઈ રહ્યા છે, તો બીજી તરફ ખેલૈયાઓની સુરક્ષાને લઈને ચિંતા વ્યક્ત કરવામાં આવી રહી છે.
મળતી વિગતો મુજબ, ફાયર વિભાગની ટીમે આયોજન સ્થળે એક-બે નહીં, પરંતુ પાંચ વખત તપાસ માટે પહોંચવાનો પ્રયાસ કર્યો હતો. જોકે, દરેક વખતે વીજળીનું કનેક્શન ન હોવાનું કારણ આપવામાં આવ્યું હોવાનો આક્ષેપ છે. ફાયરની ટીમ સ્થળ પર પહોંચવાની શક્યતાને ધ્યાનમાં રાખીને સવારના સમયે ફાયર સેફ્ટીનાં સાધનો મૂકવામાં આવ્યાં હોવાની પણ ચર્ચા છે. આ ઉપરાંત AC ડોમમાં અનેક સ્થળોએ ખુલ્લા અને જોખમી ઇલેક્ટ્રિક વાયરો જોવા મળ્યા હોવાનો મુદ્દો પણ સામે આવ્યો છે.
સૌથી મોટો સવાલ એ છે કે ફાયર વિભાગની NOC વિના ગરબાનું આયોજન કેવી રીતે થયું? જો ફાયર વિભાગે આ આયોજન અંગે પોલીસને જાણ કરી હતી, તો પછી ગરબાનું આયોજન રોકવામાં કેમ આવ્યું નહીં? NOC ન હોવા છતાં હજારો લોકોની હાજરીમાં કાર્યક્રમ યોજાયો હોવાના આક્ષેપને પગલે પોલીસની ભૂમિકા સામે પણ સવાલો ઊભા થયા છે.
બીજી તરફ, સરકારી નિગમની સ્પોન્સરશિપ મેળવનારા આયોજકો દ્વારા જ નિયમોનું પાલન કરવામાં આવ્યું કે નહીં, તે મુદ્દે પણ ચર્ચા થઈ રહી છે. જો આયોજન માટે જરૂરી મંજૂરીઓ લેવામાં આવી ન હોય, તો જવાબદારી કોની બને અને ખેલૈયાઓની સુરક્ષા માટે કયા પગલાં લેવામાં આવ્યાં હતાં, તે અંગે સ્પષ્ટતા જરૂરી છે.
નવરાત્રિ દરમિયાન હજારો લોકો એકસાથે ગરબા રમવા માટે એકત્રિત થતા હોય છે. આવા સમયે ફાયર સેફ્ટી, ઇમરજન્સી એક્ઝિટ, ઇલેક્ટ્રિક વાયરિંગ અને આગ જેવી દુર્ઘટનાથી બચવા માટેની વ્યવસ્થાઓ અત્યંત મહત્ત્વની બની જાય છે. તેથી, પ્રથમ નવરાત્રિ દરમિયાન જ નિયમોના પાલન અંગે સવાલો ઊભા થતાં હવે આગામી કાર્યક્રમોમાં ખેલૈયાઓની સુરક્ષા કેવી રીતે સુનિશ્ચિત કરવામાં આવશે તે જોવાનું રહેશે. આ મામલે સંબંધિત વિભાગો દ્વારા તપાસ કરીને હકીકત સ્પષ્ટ કરવામાં આવે તેવી માંગ ઊઠી રહી છે.