અમદાવાદમાં છેલ્લા 89 વર્ષથી દુર્ગાપૂજાની પરંપરા અકબંધ રહી છે. આ વર્ષે પણ સિંધુભવન રોડ ખાતે બંગાળી સમાજ દ્વારા આયોજિત આ ઉત્સવ ધામધૂમથી ઉજવાઈ રહ્યો છે. મહાષષ્ઠીથી વિજયાદશમી સુધી ચાલતા આ પાંચ દિવસીય મહોત્સવમાં હજારો શ્રદ્ધાળુઓ મા દુર્ગાના દર્શન કરી રહ્યા છે.
આ પૂજાનો ઇતિહાસ ઘણો જૂનો છે. દાયકાઓ પહેલાં સેટેલાઇટ વિસ્તારથી નાના પાયે શરૂ થયેલી આ પૂજા આજે વિશાળ સ્વરૂપ ધારણ કરી ચૂકી છે. આ વર્ષે સિંધુભવન રોડ પર ખાસ ભવ્ય પંડાલ તૈયાર કરવામાં આવ્યો છે, જ્યાં બંગાળી પરંપરા મુજબ મા દુર્ગાની મૂર્તિની સ્થાપના કરીને વિધિવત નિત્ય પૂજા-અર્ચના કરવામાં આવે છે.
મહોત્સવના મુખ્ય આકર્ષણોમાં દરરોજ સાંજે ઢોલ-નગારાના તાલે થતી વિશેષ સંધ્યા આરતી અને પરંપરાગત 'ધુનુચી નૃત્ય'નો સમાવેશ થાય છે. ઉપરાંત, બંગાળી કલાકારો દ્વારા સાંસ્કૃતિક કાર્યક્રમો અને નાટકોનું પણ આયોજન કરવામાં આવે છે, જેનો લાભ બોડકદેવ, સેટેલાઇટ અને સમગ્ર અમદાવાદમાંથી આવતા પરિવારજનો લે છે.
પૂજાના પાંચેય દિવસ દરમિયાન આવતા તમામ ભક્તો માટે વિશેષ 'ભોગ' એટલે કે મહાપ્રસાદનું પણ આયોજન કરવામાં આવ્યું છે. કોમર્શિયલ ગરબાના યુગમાં પણ અમદાવાદમાં વસતો બંગાળી સમાજ પોતાની સદીઓ જૂની સંસ્કૃતિ અને પરંપરાને જાળવી રાખીને શહેરને 'મિની બંગાળ'ના રંગમાં રંગી દે છે.