અમદાવાદમાં શુક્રવારે (29 સપ્ટેમ્બર) કોંગ્રેસે મતદાર યાદી સુધારણા (SIR) પ્રક્રિયા સામે વિરોધ પ્રદર્શન કર્યું. પતંગ હોટેલ ખાતેથી રૂપાલી સિનેમા સુધી રેલી કાઢવામાં આવી. કાર્યકરોએ કાળા કપડાં પહેરીને નારા લગાવ્યા. મુખ્ય ચૂંટણી કમિશનર જ્ઞાનેશ કુમારનું પૂતળું સળગાવવામાં આવ્યું. એક કાર્યકરને માસ્ક પહેરાવીને દોરડાથી બાંધવામાં આવ્યો હતો. આ રેલીની આગેવાની અમિત ચાવડાએ કરી હતી. કોંગ્રેસના નેતા અને કાર્યકરોએ 'વોટ ચોર ગદ્દી છોડ' જેવા નારા લગાવ્યા.
કોંગ્રેસનો આરોપ છે કે SIR પ્રક્રિયા દરમિયાન દેશભરમાંથી અંદાજે 13 કરોડ કાયદેસર મતદારોના નામ ગેરકાયદે રદ કરવામાં આવ્યા છે. પાર્ટીએ કેન્દ્ર સરકાર પર ચૂંટણી પંચની તટસ્થતા પર દબાણ લાવવાનો આરોપ લગાવ્યો છે. ગુજરાતમાં છેલ્લા બે દિવસથી આ વિરોધ પ્રદર્શનો ચાલી રહ્યા છે. અમદાવાદમાં યોજાયેલી આ રેલીમાં મોટી સંખ્યામાં કોંગ્રેસ કાર્યકરો જોડાયા હતા.
વિરોધ પ્રદર્શનને ધ્યાનમાં રાખીને પોલીસે ઘટનાસ્થળે એસીપી સહિત મોટો કાફલો તૈનાત કર્યો હતો. પોલીસે કોઈ અનિચ્છનીય ઘટના ન થાય તે માટે વ્યવસ્થા કરી હતી. કોંગ્રેસ નેતાઓએ મુખ્ય ચૂંટણી કમિશનરના રાજીનામાની માંગ કરી છે. આંદોલન દેશવ્યાપી છે અને ગુજરાતમાં પણ તેની અસર જોવા મળી રહી છે. ધરણા અને રેલીમાં શામેલ થનારા કાર્યકરોએ સરકાર વિરુદ્ધ ગંભીર આક્ષેપો કર્યા છે.