અમદાવાદમાં મંગળવારે હવાની ગુણવત્તામાં સોમવારની સરખામણીએ થોડો સુધારો જોવા મળ્યો છે. સોમવારે શહેરનો સરેરાશ એર ક્વોલિટી ઈન્ડેક્સ (AQI) 200 સુધી પહોંચી ગયો હતો, જે મંગળવારે ઘટીને 167 થયો છે. આથી નાગરિકોએ રાહતનો શ્વાસ લીધો છે. પરંતુ શહેરના કેટલાક વિસ્તારોમાં હવાની ગુણવત્તા હજુ પણ ચિંતાજનક સ્તરે છે.
અમદાવાદમાં સૌથી વધુ પ્રદૂષણ ગોતા વિસ્તારમાં નોંધાયું છે, જ્યાં AQI 220 રહ્યો છે. આ સ્તર સ્વાસ્થ્ય માટે હાનિકારક માનવામાં આવે છે. ભાડજ વિસ્તારમાં પણ AQI 203 નોંધાયો છે, જે ચિંતાનો વિષય છે. ઘાટલોડિયા અને સાબરમતીમાં AQI 182, ચાંદખેડામાં 185, નરોડામાં 171 અને કુબેરનગરમાં 170 નોંધાયો છે. આ વિસ્તારોમાં હવાની ગુણવત્તા મધ્યમથી નબળી શ્રેણીમાં રહી છે.
વધતા પ્રદૂષણને ધ્યાનમાં રાખીને તબીબોએ શ્વાસના દર્દીઓ, બાળકો અને વૃદ્ધોને ખાસ સાવચેતી રાખવાની સલાહ આપી છે. તેમણે માસ્ક પહેરવા, સવારે વહેલા બહાર નીકળતી વખતે સાવચેતી રાખવા અને પ્રદૂષિત વાતાવરણમાં લાંબો સમય બહાર રહેવાનું ટાળવા જણાવ્યું છે. સરેરાશ AQIમાં ઘટાડો થયો હોવા છતાં ગોતા અને ભાડજ જેવા વિસ્તારોમાં પ્રદૂષણનું ઊંચું પ્રમાણ ચિંતાનો વિષય બન્યું છે. તેથી શહેરવાસીઓએ હવાની ગુણવત્તાને ધ્યાનમાં રાખીને સ્વાસ્થ્યનું ધ્યાન રાખવું જરૂરી છે.