અમદાવાદમાં નવરાત્રિના દિવસોમાં વાયુ પ્રદૂષણમાં ચિંતાજનક વધારો નોંધાયો છે. ધૂળિયા રસ્તા અને વધતા ટ્રાફિકને કારણે શહેરની હવાની ગુણવત્તા પર ગંભીર અસર થઈ છે. વાહનોના ધુમાડા અને ધૂળના રજકણો હવામાં ભળી રહ્યા છે.
શહેરમાં એર ક્વોલિટી ઇન્ડેક્સ (AQI)માં નોંધપાત્ર ઉછાળો જોવા મળ્યો છે. અમદાવાદ એરપોર્ટ વિસ્તારમાં સૌથી વધુ AQI 244 નોંધાયો છે, જે ખૂબ ખરાબ શ્રેણીમાં આવે છે. બોપલ જેવા અન્ય વિસ્તારોમાં AQI 155 નોંધાયો છે, જે મધ્યમથી ખરાબ શ્રેણી દર્શાવે છે. શહેરના અનેક વિસ્તારોમાં પણ હવાની ગુણવત્તા કથળી છે.
વધતા પ્રદૂષણની સીધી અસર લોકોના સ્વાસ્થ્ય પર દેખાઈ રહી છે. ડોકટરો અને આરોગ્ય નિષ્ણાતોના જણાવ્યા મુજબ અસ્થમા અને સૂકી ખાંસી જેવા શ્વસન રોગોના દર્દીઓની સંખ્યામાં વધારો થયો છે. બાળકો, વૃદ્ધો અને શ્વસન રોગથી પીડાતા લોકો માટે આ સ્થિતિ વધુ ચિંતાનો વિષય છે.
નિષ્ણાતોના મતે પ્રદૂષણ ઘટાડવા માટે રસ્તાઓ પર પાણીનો છંટકાવ, ધૂળ નિયંત્રણના પગલાં અને ટ્રાફિક વ્યવસ્થાપન જેવા ઉપાયો સમયસર લેવા જરૂરી છે. સત્તાવાળાઓ તરફથી આ મુદ્દે ત્વરિત પગલાં લેવામાં આવે તેવી અપેક્ષા રાખવામાં આવી રહી છે.