ભારતીય સેનામાં ભરતી થનારા યુવાનો માટે એક મહત્વપૂર્ણ સમાચાર સામે આવ્યા છે. કેન્દ્ર સરકારે 'અગ્નિવીર' યોજનામાં મોટો ફેરફાર કર્યો છે. હવેથી જે અગ્નિવીરો પોતાની બે વર્ષની વધારાની સેવા પૂરી કરશે, તેમને ભારતીય સેનામાં કાયમી સભ્ય તરીકે સમાવી લેવામાં આવશે.
સમાચાર એજન્સી ANI એ સંરક્ષણ મંત્રાલયના ઉચ્ચ અધિકારીઓને ટાંકીને આ માહિતી આપી છે. આ નિર્ણય એવા સમયે આવ્યો છે જ્યારે સરકારે થોડા સમય પહેલાં જ જાહેર કર્યું હતું કે ચાર વર્ષનો કાર્યકાળ પૂરો કરનારા અગ્નિવીરોને સેવામાં બે વર્ષનું વધારાનું એક્સટેન્શન આપવામાં આવશે.
નવા નિયમ મુજબ, જે જવાનો નિર્ધારિત શરતો અને નિયમો પૂરા કરશે અને પોતાની સંમતિ આપશે, તેમને સેનામાં કાયમી ભરતીની તક મળશે.
જૂના નિયમ અને નવા ફેરફાર વચ્ચે શું તફાવત છે?
ચીફ ઓફ ડિફેન્સ સ્ટાફ (CDS) જનરલ એન. એસ. રાજા સુબ્રમણ્યે આ અંગે પહેલાં સ્પષ્ટતા કરી હતી. તેમના જણાવ્યા અનુસાર, અત્યાર સુધીની જોગવાઈ એવી હતી કે 100 ટકામાંથી માત્ર 25 ટકા અગ્નિવીરોને જ તેમની યોગ્યતાના આધારે સેનામાં નિયમિત ધોરણે કાયમી કરવામાં આવતા હતા. બાકીના 75 ટકા યુવાનોને ચાર વર્ષ પછી નિવૃત્ત કરી દેવામાં આવતા હતા.
હવે સરકારે આ નિયમમાં યુવાનોના હિતમાં ફેરફાર કર્યો છે. નવા નિર્ણય મુજબ, નિવૃત્ત થનારા આ 75 ટકા યુવાનોને હવે બે વર્ષનો વધારાનો સેવા સમયગાળો આપવામાં આવશે. આ સમયગાળો પૂરો થયા પછી, જે અગ્નિવીરો સેનાના પસંદગીના માપદંડો પૂરા કરશે અને આગળ સેવા આપવા માંગશે, તેમને સશસ્ત્ર દળોમાં કાયમી ધોરણે સામેલ કરવામાં આવશે.
'અગ્નિપથ' યોજનાની પૃષ્ઠભૂમિ
ભારત સરકારે જૂન 2022માં સશસ્ત્ર દળોમાં યુવાનોની ભરતી માટે 'અગ્નિપથ' યોજના શરૂ કરી હતી. આ યોજના હેઠળ 17.5 વર્ષથી 21 વર્ષ સુધીની વયના યુવાનોને સૈન્યમાં ચાર વર્ષના ટૂંકા કાર્યકાળ માટે ભરતી કરવાની જોગવાઈ છે. ચાર વર્ષ પછી માત્ર 25 ટકા યુવાનોને જ 15 વર્ષ માટે નિયમિત સેવામાં રાખવાના જૂના નિયમને લઈને કોંગ્રેસ સહિતની ઘણી વિપક્ષી પાર્ટીઓએ સરકારની ટીકા કરી હતી. તેમણે સવાલ ઉઠાવ્યો હતો કે ચાર વર્ષ પછી બાકીના 75 ટકા યુવાનોનું ભવિષ્ય શું થશે.
હવે સરકારે આ ફેરફાર કરીને યુવાનોના ભવિષ્યને લગતી ચિંતા દૂર કરવાનો પ્રયાસ કર્યો છે. નોંધનીય વાત એ છે કે લગભગ 18,000 અગ્નિવીરો સશસ્ત્ર દળોમાંથી નિવૃત્ત થવાના હતા, તેના ત્રણ અઠવાડિયા પહેલા જ આ નિર્ણય આવ્યો છે.
હાલમાં 3,00,000થી વધુ યુવાનો અગ્નિપથ યોજના હેઠળ સશસ્ત્ર દળોમાં ફરજ બજાવી રહ્યા છે. આ નિર્ણયથી તાલીમ પામેલા અને અનુભવી સૈનિકો લાંબા સમય સુધી સેનામાં રહેશે, જેનાથી ભારતીય સેનાની તાકાતમાં વધારો થશે.