કેન્દ્ર સરકારે અગ્નિવીર યોજનામાં મહત્વપૂર્ણ ફેરફાર કર્યો છે. સંરક્ષણ મંત્રાલયના સૂત્રોના હવાલાથી મળેલી માહિતી મુજબ, હવે 2 વર્ષની સેવા પૂર્ણ કરનારા તમામ અગ્નિવીરોને ભારતીય સેનામાં કાયમી ધોરણે સમાવી લેવામાં આવશે. સેનાના ઉચ્ચ અધિકારીઓએ આ નિર્ણયની પુષ્ટિ કરી છે. આ નિર્ણયથી અગ્નિવીરો માટે સ્થાયી કારકિર્દીનો માર્ગ ખૂલશે.
આ અહેવાલ એવા સમયે સામે આવ્યો છે જ્યારે સરકારે બુધવારે જાહેરાત કરી હતી કે 4 વર્ષનો કાર્યકાળ પૂર્ણ કરીને સેવામુક્ત થનારા અગ્નિવીરોને 2 વર્ષનું વધારાનું સેવા વિસ્તરણ આપવામાં આવશે. ત્યારબાદ નિયત નિયમો અને શરતો પૂર્ણ કરનારા તથા સંમતિ આપનારા અગ્નિવીરોને કાયમી ભરતીની તક મળશે.
આ અંગે સીડીએસ જનરલ એન. એસ. રાજા સુબ્રમણિએ અગાઉ જણાવ્યું હતું કે, વર્તમાન જોગવાઈ મુજબ 25 ટકા અગ્નિવીરોને યોગ્યતાના આધારે નિયમિત દળોમાં સામેલ કરવામાં આવે છે, જ્યારે બાકીના 75 ટકા જવાનો સેવામાંથી મુક્ત થઈ જાય છે. નવા ફેરફારો હેઠળ આ 75 ટકા અગ્નિવીરોને 2 વર્ષના વધારાના સેવા કાર્યકાળની ઓફર કરવામાં આવશે. આ વિસ્તૃત સમયગાળો પૂર્ણ થયા બાદ નિર્ધારિત પસંદગીના માપદંડો પૂરા કરનારા અને સેવા ચાલુ રાખવા ઈચ્છુક અગ્નિવીરોને સશસ્ત્ર દળોમાં કાયમી ધોરણે સામેલ કરવામાં આવશે.
જૂન 2022માં શરૂ થયેલી 'અગ્નિપથ' યોજના અંતર્ગત સૈનિકોની ભરતી 4 વર્ષના કાર્યકાળ માટે કરવામાં આવી હતી. તે સમયે કુલ ભરતી થયેલા જવાનોમાંથી માત્ર 25 ટકાને જ નિયમિત સેવામાં જાળવી રાખવાની જોગવાઈ હતી. યોજનામાં આ સુધારો લગભગ 18,000 અગ્નિવીરો સશસ્ત્ર દળોમાંથી નિવૃત્ત/મુક્ત થવાના ત્રણ અઠવાડિયા પહેલાં જ લેવાયો છે. હાલમાં અગ્નિપથ યોજના હેઠળ ભરતી કરાયેલા 3 લાખથી વધુ સૈનિકો દેશના સશસ્ત્ર દળોમાં પોતાની સેવાઓ આપી રહ્યા છે.
અગ્નિપથ યોજના હેઠળ 17.5 થી 21 વર્ષની વયના યુવાનોને 4 વર્ષના કાર્યકાળ માટે ભરતી કરવાની જોગવાઈ છે. કોંગ્રેસ સહિતના વિપક્ષી પક્ષોએ યોજના સામે સવાલો ઉઠાવ્યા હતા કે 4 વર્ષ પછી સેવામાંથી બહાર થનારા 75 ટકા અગ્નિવીરોનું ભવિષ્ય શું રહેશે, કારણ કે માત્ર 25 ટકા જવાનોને જ 15 વર્ષ માટે નિયમિત સેવામાં રાખવામાં આવતા હતા. વિપક્ષના આ વિરોધ અને ચિંતાઓ વચ્ચે સરકારે યોજનામાં આ મહત્વપૂર્ણ સુધારો લાગુ કર્યો છે.