અદાણી એનર્જી સોલ્યુશન્સે 2026-27ના બીજા ત્રિમાસિક ગાળામાં ₹1,323 કરોડનો ચોખ્ખો નફો નોંધાવ્યો છે, જે ગયા વર્ષના સમાન ગાળાના ₹534 કરોડ કરતાં 148% વધુ છે. કંપનીને મળેલી ₹1,581 કરોડની ટેક્સ રાહતને કારણે નફામાં આ મોટો વધારો થયો છે.
કંપનીની કામગીરીમાંથી થતી આવક (ઓપરેશનલ રેવન્યુ) 52.8% વધીને ₹10,075.5 કરોડ થઈ છે, જે ગયા વર્ષે આ જ સમયગાળામાં ₹6,596 કરોડ હતી. કંપનીનો ઓપરેટિંગ પ્રોફિટ પણ વધ્યો છે.
જોકે, શેરબજારમાં કંપનીના શેરમાં નરમાઈ જોવા મળી રહી છે. બુધવારે શેર 2.94% ઘટીને ₹1,326 પર બંધ થયો હતો, જ્યારે ગુરુવારે તે 2% ઘટીને ₹1,295 પર આવી ગયો હતો. નિષ્ણાતો હાલમાં રોકાણકારોને નવી ખરીદી ટાળવાની સલાહ આપી રહ્યા છે.
આ પહેલા, પ્રથમ ત્રિમાસિક ગાળામાં (એપ્રિલ-જૂન) કંપનીનો નફો 124% વધીને ₹1,149 કરોડ થયો હતો, જે ગયા વર્ષે ₹512 કરોડ હતો. ઓપરેશનલ આવક 42% વધીને ₹9,711 કરોડ થઈ હતી.
કંપનીનો EBITDA (કર, વ્યાજ અને ઘસારા પહેલાંનો નફો) 35.5% વધીને ₹3,101.5 કરોડ થયો છે, જે ગયા વર્ષે ₹2,289 કરોડ હતો. જોકે, ખર્ચમાં વધારાને કારણે EBITDA માર્જિન 34.7%થી ઘટીને 30.7% થયું છે. એટલે કે, આવક વધી છે પણ ખર્ચ પણ વધ્યો છે, જેથી પ્રતિ ₹100ની આવક પરની બચત ઘટી છે.
અદાણી એનર્જી સોલ્યુશન્સના CEO કંદર્પ પટેલે જણાવ્યું કે, કંપનીના તમામ બિઝનેસમાં દરેક ત્રિમાસિક ગાળામાં મજબૂતી આવી છે. સારા ઓપરેટિંગ પર્ફોર્મન્સ અને સમજદારીપૂર્વકના નાણાં મેનેજમેન્ટના આધારે અમે મોટા પ્રોજેક્ટ્સને સમયસર પૂર્ણ કરવા સક્ષમ છીએ, જેથી લાંબા ગાળે રોકાણકારોને લાભ થશે.
અદાણી એનર્જી સોલ્યુશન્સ દેશની સૌથી મોટી ખાનગી પાવર ટ્રાન્સમિશન કંપની છે, જે 16 રાજ્યોમાં 26,600 કિમીથી વધુ ટ્રાન્સમિશન લાઇનો ધરાવે છે. કંપની મુંબઈ અને મુન્દ્રા SEZમાં 1.2 કરોડ ગ્રાહકોને વીજળી પૂરી પાડે છે અને 2.28 કરોડ સ્માર્ટ મીટર લગાવવાના ઓર્ડર પર કામ કરી રહી છે. કંપનીએ દેશની પ્રથમ ખાનગી HVDC લાઇન પાથરી છે અને QIP મારફતે ₹8,373 કરોડનું ભંડોળ એકત્ર કર્યું છે.