બંગાળ ક્રિકેટ એસોસિએશને રણજી ટ્રોફીની નવી સીઝનની પ્રથમ મેચ માટે ૧૬ સભ્યોની ટીમ જાહેર કરી છે. આ ટીમમાં વિકેટકીપર-બેટર અભિષેક પોરેલને સ્થાન આપવામાં આવ્યું છે, જે બળાત્કારના કેસમાં જામીન પર છે. ટીમની કેપ્ટનશિપ અભિમન્યુ ઈશ્વરન કરશે, જ્યારે સુદીપ કુમાર ઘરામી ઉપકેપ્ટન તરીકે રહેશે.
એલિટ ગ્રુપ-Cની ઓપનિંગ મેચમાં બંગાળનો સામનો દિલ્હી સામે થશે. આ મેચ કાલ્યાણીના બંગાળ ક્રિકેટ અકાદમી ગ્રાઉન્ડ પર રમાશે, જે પહેલાં કોલકાતાના ઈડન ગાર્ડન્સમાં યોજાવાની હતી. ૧૦ ઓક્ટોબરે ઈડન ગાર્ડન્સમાં દુર્ગા પૂજા ઉત્સવના ઉદ્ઘાટનનો કાર્યક્રમ છે, જેમાં વડાપ્રધાન નરેન્દ્ર મોદી હાજરી આપશે. તેના કારણે મેચને કાલ્યાણી ખસેડવામાં આવી છે. ગ્રુપ-Cમાં બંગાળ ઉપરાંત ગુજરાત, ઝારખંડ, કેરળ, મહારાષ્ટ્ર, ઓડિશા અને સર્વિસિસનો સમાવેશ થાય છે.
અભિષેક પોરેલ પર ૩૦ જૂને એક મેડિકલ વિદ્યાર્થીનીએ બળાત્કાર, લગ્નનું વચન આપીને જાતીય સંબંધ બાંધવા અને ગુનાહિત ધમકી આપવાના આરોપ લગાવ્યા હતા. ધરપકડ બાદ તે લગભગ ૩૬ દિવસ જેલમાં રહ્યો હતો. ૧૧ ઓગસ્ટે ધરપકડ બાદ તેને કોર્ટમાં રજૂ કરવામાં આવ્યો અને ત્રણ દિવસની પોલીસ કસ્ટડીમાં મોકલવામાં આવ્યો. ૧૪ ઓગસ્ટે પોલીસ કસ્ટડી પૂર્ણ થયા બાદ જામીન ન મળતાં કોર્ટે તેને ૧૪ દિવસની ન્યાયિક કસ્ટડીમાં મોકલી દીધો. ૧૮ સપ્ટેમ્બરે કોર્ટે તેને જામીન આપ્યા હતા. પોરેલે તેના પર લાગેલા આરોપોને નકારી કાઢ્યા છે. આ મામલો હાલ કોર્ટમાં વિચારાધીન છે. આ પહેલાં યશ દયાલ, શિવાલિક શર્મા અને વિપરાજ નિગમ જેવા ક્રિકેટરો પર પણ બળાત્કારના આરોપો લાગ્યા છે. BCCIએ ખેલાડીઓને શિસ્તબદ્ધ રહેવાની સૂચના આપી છે.
અભિષેક પોરેલે IPL ૨૦૨૬માં દિલ્હી કેપિટલ્સ માટે માત્ર ચાર મેચ રમી હતી. ત્યાર બાદ તે કોઈ સ્પર્ધાત્મક ક્રિકેટ રમ્યો નથી. આસામ સામેની પ્રેક્ટિસ મેચ તેના માટે લાંબા વિરામ બાદ મેદાન પર પરત ફરવાની તક હશે.
ટીમમાં મોહમ્મદ શમી, મુકેશ કુમાર અને આકાશ દીપને પણ સ્થાન આપવામાં આવ્યું છે. આકાશ દીપ ઈજામાંથી વાપસી કરી રહ્યો છે. ન્યૂઝીલેન્ડ પ્રવાસ પહેલાં આ મેચ તેના માટે ફિટનેસ અને ફોર્મ સાબિત કરવાની તક હશે. ઝડપી બોલિંગમાં તેના ઉપરાંત સૂરજ સિંધુ જયસવાલ, પ્રદીપ્ત પ્રમાણિક અને મોહમ્મદ કૈફને સ્થાન મળ્યું છે.
બંગાળની ૧૬ સભ્યોની ટીમ: અભિમન્યુ ઈશ્વરન (કેપ્ટન), સુદીપ કુમાર ઘરામી (વાઇસ કેપ્ટન), સુદીપ ચેટર્જી, અભિષેક પોરેલ (વિકેટકીપર), અંકુર પોલ, સુમંતા ગુપ્તા, અંકિત શુક્લા, શુભમ ચેટર્જી, મોહમ્મદ શમી, આકાશ દીપ, મુકેશ કુમાર, સૂરજ સિંધુ જયસ્વાલ, પ્રદીપ્ત પ્રમાણિક, આમિર ગની, મોહમ્મદ કૈફ, સૌમ્યદીપ મંડલ. સ્ટેન્ડ-બાય: કરણ લાલ, અખિલેશ યાદવ, ગીત પુરી, અભિષેક કેઆર રમણ, શુભમ સરકાર, સુમિત મોહંતા, આદિત્ય પુરોહિત.