કોકરોચ જનતા પાર્ટીના સ્થાપક અભિજિત દીપકેએ વિપક્ષી પક્ષો સામે આકરા પ્રહારો કર્યા છે. તેમણે શુક્રવારે કહ્યું કે વિપક્ષને પોતાનું રાજકીય અસ્તિત્વ ખતમ થવાનો ડર સતાવે છે, અને એટલે જ તેઓ ગેરરીતિવાળી ચૂંટણીઓમાં ભાગ લઈ રહ્યા છે.
દીપકેએ ચૂંટણીઓની તુલના ફિક્સ્ડ મેચ સાથે કરી. તેમણે કહ્યું કે જેમ ફિક્સ્ડ મેચમાં દરેક કેચ છોડવામાં નથી આવતો, કેટલાક કેચ પકડવામાં પણ આવે છે અને મુકાબલાને જાણીજોઈને છેલ્લી ઓવર સુધી લઈ જવામાં આવે છે જેથી લોકોને લાગે કે આ રોમાંચક અને નજીકની ટક્કર હતી. એ જ રીતે અમુક જગ્યાએ વિપક્ષને જીતાડીને લોકોને નિષ્પક્ષતાનો ભ્રમ કરાવવામાં આવે છે.
તેમણે વિપક્ષને અપીલ કરી કે તેઓ આવી ચૂંટણીઓનો બહિષ્કાર કરે. તેમણે કહ્યું, 'જ્યારે ખુલ્લેઆમ વોટ ચોરી થાય છે, તમારા ધારાસભ્યો અને સાંસદો તોડવામાં આવે છે અને પાર્ટીઓમાં ભાગલા પડે છે, ત્યારે તમે કેવું રાજકીય અસ્તિત્વ બચાવવા માંગો છો? તમે તો એવી વ્યવસ્થાનો હિસ્સો બની રહ્યા છો જે તમને નબળા બનાવે છે.'
દીપકેએ કહ્યું કે વિપક્ષે પોતાની રાજકીય ચિંતા છોડીને સ્પષ્ટ વલણ લેવું પડશે. જ્યારે ખબર છે કે રમત પક્ષપાતી છે, તો તે રમતમાં ભાગ લઈને તેને માન્યતા આપવાનું બંધ કરવું જોઈએ. પોતાના હિતો પહેલાં દેશ અને લોકશાહી વિશે વિચારીને ચૂંટણીઓનો બહિષ્કાર કરવો જોઈએ.
ઉલ્લેખનીય છે કે દીપકેનું આ નિવેદન એવા સમયે આવ્યું છે જ્યારે દેશમાં ચૂંટણી સુધારણા અંગે ચર્ચા ચાલી રહી છે.