નવી દિલ્હી: જો તમારા આધાર કાર્ડમાં નામનું સ્પેલિંગ ખોટું છે, લગ્ન પછી અટક બદલવી છે અથવા આખું નામ બદલવું છે, તો હવે નિયમો બદલાઈ ગયા છે. આધાર જારી કરતી સંસ્થા UIDAIએ તાજેતરમાં નામમાં સુધારો અને ફેરફાર કરવા માટે નવા નિયમો લાગુ કર્યા છે.
નવા નિયમો અનુસાર, હવે દરેક પ્રકારના ફેરફાર માટે અલગ-અલગ સરકારી દસ્તાવેજો, ફોર્મ અથવા એફિડેવિટ આપવું પડશે. એક જ દસ્તાવેજથી તમામ કામ નહીં થાય. છેતરપિંડી રોકવા માટે UIDAI જમા કરાવેલા તમામ દસ્તાવેજોની બારીકાઈથી તપાસ કરશે.
નામમાં થતા પાંચ પ્રકારના ફેરફારોના નિયમો સમજો:
1. સ્પેલિંગમાં નાનકડા સુધારા માટે દસ્તાવેજ
નામમાં નાની-મોટી સ્પેલિંગની ભૂલ સુધારવી, મિડલ કે લાસ્ટ નેમ ઉમેરવું કે કાઢી નાખવું અને નામનો ક્રમ બદલવો—આ બધાને 'માઇનર નેમ ચેન્જ' ગણવામાં આવશે (જેમ કે Ram ને Rama કરવું). આ માટે માત્ર એક માન્ય ઓળખપત્ર આપવું પડશે. 18 વર્ષથી ઓછી ઉંમરના બાળકો માટે પરિવારના વડાના આધાર પર 'પ્રૂફ ઓફ રિલેશનશિપ' પણ માન્ય રહેશે.
2. ઓપરેટરની ભૂલ (ડેટા-એન્ટ્રી એરર) સુધારવી
જો તમારા દસ્તાવેજો સાચા હતા, પરંતુ ઓપરેટરની ભૂલને કારણે આધાર કાર્ડમાં નામ ખોટું નોંધાયું છે, તો તેને સુધારવા માટે એફિડેવિટ આપવું પડશે. પુખ્તો માટે Annexure B અને બાળકો માટે Annexure C ફોર્મ સાથે ઓળખ કે સંબંધનો પુરાવો જોડવો પડશે. ધ્યાનમાં રાખો કે નવું નામ તમારા અગાઉ જમા કરાવેલા દસ્તાવેજો સાથે મેળ ખાતું હોવું જોઈએ, નહીં તો વિનંતી નામંજૂર થઈ શકે છે.
3. લગ્ન અથવા છૂટાછેડા પછી અટક બદલવી
લગ્ન અથવા છૂટાછેડા પછી અટક બદલવા માટે ઓળખપત્ર સાથે Annexure Dનું એફિડેવિટ જમા કરાવવું પડશે. તેમાં સ્પષ્ટ કરવું પડશે કે આ ફેરફાર માત્ર લગ્ન અથવા છૂટાછેડાને કારણે કરવામાં આવી રહ્યો છે. વિકલ્પ તરીકે નોંધાયેલ લગ્ન પ્રમાણપત્ર પણ માન્ય રહેશે. તેમજ લિંગ પરિવર્તન પછી નામ બદલવા માટે પણ ઓળખપત્ર આપવું પડશે.
4. દસ્તાવેજ વિના પણ આ ભૂલો સુધારી શકાશે
નામમાં રૅન્ડમ કેપિટલ લેટર્સને સુધારવા (જેમ કે 'RaMesh'ને 'Ramesh' કરવું) અથવા નામમાંથી ડોટ્સ દૂર કરવા માટે કોઈ દસ્તાવેજની જરૂર પડશે નહીં. જ્યારે 'ઉર્ફ' અથવા 'અલિયાસ' ધરાવતા નામોમાંથી એક નામ પસંદ કરવા માટે એફિડેવિટ (વયસ્કો માટે Annexure E અને બાળકો માટે Annexure F) જરૂરી રહેશે. આધાર કાર્ડમાં મિલિટરી રેન્ક અથવા પદ ઉમેરવાની મંજૂરી નથી.
5. પૂરું નામ બદલવા માટે ગેઝેટ નોટિફિકેશન જરૂરી
જો તમે તમારું પૂરું નામ બદલી રહ્યા છો અથવા એવો ફેરફાર કરી રહ્યા છો, જેના કારણે તમારી ઓળખ બદલાય છે, તો તેને 'મેજર નેમ ચેન્જ' માનવામાં આવશે. આ માટે કેન્દ્ર અથવા રાજ્ય સરકારનું ગેઝેટ નોટિફિકેશન અને ઓળખપત્ર આપવું ફરજિયાત છે. UIDAI જૂના રેકોર્ડ સાથે નવા નામની સરખામણી અને દસ્તાવેજોની ચકાસણી કર્યા પછી જ તેને અપડેટ કરશે.