કેન્દ્ર સરકારના કર્મચારીઓ અને પેન્શનધારકોમાં 8મા પગાર પંચને લઈને ઉત્સુકતા છે. ખાસ કરીને એવા કર્મચારીઓના મનમાં સવાલ છે, જેઓ નવી ભલામણો લાગુ થાય તે પહેલાં નિવૃત્ત થઈ જશે. શું તેમને પણ વધેલા પગારનું એરિયર્સ મળશે? શું પહેલેથી નિવૃત્ત થયેલા કર્મચારીઓની પેન્શનમાં વધારો થશે? આ સવાલો ચર્ચામાં છે.
8મા પગાર પંચની ભલામણો 1 જાન્યુઆરી 2026થી અમલમાં આવે તેવી અપેક્ષા છે. જોકે, અંતિમ નિર્ણય કેન્દ્ર સરકારના સત્તાવાર આદેશ પર આધારિત રહેશે. જો સરકાર નવો પગાર માળખો 1 જાન્યુઆરી 2026થી લાગુ કરે છે, તો તે સમયગાળા દરમિયાન નિવૃત્ત થયેલા કર્મચારીઓને પણ એરિયર્સ મળી શકે છે.
ઉદાહરણથી સમજીએ: ધારો કે કોઈ કેન્દ્રીય કર્મચારી 2027માં નિવૃત્ત થાય છે. પછી સરકાર 8મા પગાર પંચનો અમલ 1 જાન્યુઆરી 2026થી કરવાની જાહેરાત કરે છે. આ સ્થિતિમાં કર્મચારીને 1 જાન્યુઆરી 2026થી નિવૃત્તિની તારીખ સુધીના સમયગાળાનું એરિયર્સ મળી શકે છે. આ રકમ જૂના અને સુધારેલા પગાર વચ્ચેના તફાવત પરથી નક્કી થશે. જોકે, ચુકવણી સરકારના અંતિમ નિયમો અને શરતો પ્રમાણે જ થશે.
માત્ર અમલીકરણ તારીખ નક્કી થવાથી દરેક કર્મચારીને આપમેળે એરિયર્સ મળી જશે એમ કહી શકાય નહીં. કોને લાભ મળશે અને ગણતરી કેવી રીતે થશે તે અંગે સરકારના અંતિમ આદેશની રાહ જોવી પડશે.
8મા પગાર પંચના કાર્યક્ષેત્રમાં પેન્શન સંબંધિત મુદ્દાઓની સમીક્ષા પણ સામેલ છે. જો સરકાર પેન્શન વધારવાની ભલામણોને મંજૂરી આપે છે, તો અગાઉ નિવૃત્ત થયેલા કર્મચારીઓને પણ સુધારેલી પેન્શનનો લાભ મળી શકે છે.
નિવૃત્ત કર્મચારીઓની ચિંતાને ધ્યાનમાં રાખીને રિટાયર્ડ એમ્પ્લોયીઝ વેલ્ફેર એસોસિએશન (REWA)એ સપ્ટેમ્બર 2026માં વડાપ્રધાન નરેન્દ્ર મોદીને પત્ર લખ્યો હતો. એસોસિએશને માંગ કરી છે કે 8મા પગાર પંચના લાભોમાં અગાઉ નિવૃત્ત થયેલા કર્મચારીઓને પણ સામેલ કરવામાં આવે. તેમણે પગાર પંચના ટર્મ્સ ઓફ રેફરન્સમાં જરૂરી ફેરફાર કરવાની રજૂઆત પણ કરી છે.
REWAનું કહેવું છે કે 1 જાન્યુઆરી 2026 પહેલાં નિવૃત્ત થયેલા પેન્શનધારકો અને ફેમિલી પેન્શન મેળવતા લોકોને પણ પેન્શન સુધારણાની પ્રક્રિયામાં સ્પષ્ટ રીતે આવરી લેવા જોઈએ. નિવૃત્ત કર્મચારીઓમાં ચિંતા છે કે નિવૃત્તિની તારીખને કારણે તેઓ નવા પગાર પંચના લાભોથી વંચિત ન રહી જાય.
હાલમાં 8મા પગાર પંચનો લાભ અગાઉ નિવૃત્ત થયેલા કર્મચારીઓને કઈ રીતે મળશે તે અંગે અંતિમ સ્પષ્ટતા નથી. એરિયર્સની ચુકવણી હોય કે પેન્શનમાં વધારો, બંને પંચની ભલામણો અને કેન્દ્ર સરકારની મંજૂરી પર આધારિત રહેશે. આથી, નિવૃત્તિની નજીક પહોંચેલા કર્મચારીઓ અને હાલના પેન્શનધારકોએ સરકારના સત્તાવાર નિર્ણયની રાહ જોવી પડશે.